Petropavldyq bal qymyz jasaýdyń qupııasymen bólisti
PETROPAVL. QazAqparat - Petropavldyq Aǵybaı men Zaıra Qydbekovtardyń dastarhanynan jyl on eki aı bal qymyz úzilmeıdi. Ata dástúrdi jalǵastyryp otyrǵan otbasy artylǵanyn satyp, qymyzdy tabys kózine de aınaldyrǵan, dep habarlaıdy QazAqparat tilshisi.
Aǵybaı men Zaıra Qydbekovtardyń jylqy ustap, bıe saýýmen aınalysyp júrgenderine otyz jylǵa jaqyndapty. Tipti, qalaǵa kóship kelgesin de ata kásipti tastaı almaı, mal ustaý úshin úıdi qalanyń shetkeri jaǵynan arnaıy alǵan eken. Qazirgi ýaqytta olardyń saýyp otyrǵan 3 bıesi bar.
«Dastarqanymyzdan qymyz úzilmeıdi. Jylqy kıeli janýar ǵoı, ony kútip-baptaýdy áke-sheshemiz úıretti. Qazir bilgenimizdi óz balalarymyzǵa úıretip jatyrmyz. Kelin-balamyz, kúıeý balamyz - bárimiz otbasymyzben aınalysamyz», - deıdi Zaıra Qydbekova.
Sharýashylyqqa deni saý, súti mol, keń qursaqty saqa bıeler tańdalyp alynypty. Qazir bıeler 3 ret saýylsa, jazda saýyn mezgili eki esege kóbeıedi. Qysta árqaısysy 5 lıtr sút berse, kók shyǵa 10-15 lıtrge jetedi eken.
«Qymyz baldaı tátti bolý úshin saýmaldy eki saǵat boıy kúbide pisirip, keıin qymyz jyly jerde 12 saǵat turyp, ashýy tıis. Sondaı-aq ydys-aıaqtyń tazalyǵyna asa mán bergen jón. Kúbini apta saıyn jýyp, keptirip otyrý qajet. Dámdi bolý úshin súrlengen qazy salady, tútinge ystaıdy», - deıdi kúbi pisken Zaıra apaı.
Balalarymen aqyldasa kele bıyl Aǵybaı men Zaıra Qydbekovter jylqy sanyn kóbeıtýdi josparlap otyr. Qazir burynǵydaı emes, qymyzǵa suranys artqan. Tapsyrys berýshiler jeterlik. Keıde kelip suraǵandarǵa jetpeı qalyp jatady eken.
