Petropavldyq áıel minip júrgen kóliginiń urlanǵanyn bilmegen
PETROPAVL. QazAqparat – Petropavldyń tártip saqshylary Reseıde urlanyp, izdeýge qoıylǵan eki mashınany anyqtady, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavlda patrýldik polıtsııa batalonynyń ekıpajy reseılik tirkeý nómirin taqqan «Seat Leon» avtokóligin toqtatqan. Mashınanyń qujattaryn tekserý kezinde onyń urlanǵanyn, RF ІІM Túmen oblysy boıynsha basqarmasy kólikti 2 qyrkúıek kúni izdeýge qoıǵany anyqtaldy.
Osy derek boıynsha materıal jınalyp, «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» baby boıynsha Sotqa deıingi tergep-tekserýdiń biryńǵaı tizilimine engizildi. Tergeýshiler kólikti qashan, kimnen alǵany jaıynda áıelden jaýap aldy. Onyń aıtýynsha, kólikti satyp alarda teksermegen, ıaǵnı onyń urlanǵanyn bilmegen. Tergeý aıasynda saraptama júrgizilip, tehpasport pen avtokólik vin-kodynyń sáıkestigi tekseriledi. Onyń izdeýdegi avtokólik ekendigi anyqtalǵan jaǵdaıda SQO polıtseıleri materıaldy reseılik áriptesterine jiberedi. Al kólik zańdy ıesine qaıtarylmaq.
Tártip saqshylarynyń aıtýynsha, bul jeltoqsan aıynda tirkelip otyrǵan osymen ekinshi oqıǵa. Aıdyń basynda patrýldik polıtseıler Petropavldaǵy Astana-Brýsılovskıı kósheleriniń qıylysynda «Chevrolet Cruse» kóligin toqtatqan. Ol mashınanyń Reseıdiń Chelıabi oblysynda urlanǵany anyqtaldy. Kólik júrgizýshisi, oblys ortalyǵynyń turǵyny usynǵan qujattarda qoldan jasaý belgileri bolǵan.
«Tsıfrlyq tehnologııany qoldaný patrýldik polıtseılerdiń jumysyn ońtaılandyrdy. Elektrondy planshet arqyly olar ákimshilik óndiristerdiń biryńǵaı tizilimi málimetter bazasyna kire alady. Olar qalada júrip kele jatyp-aq memlekettik nómirin bazaǵa engizip, kólikke qatysty saqtandyrý, tehnıkalyq baıqaý sııaqty bar málimetti ala alady. Sheteldik tirkeýi bar kólik mingisi keletin avtojúrgizýshilerge ony almas buryn muqııat tekserý qajettigin eske salamyn», - deıdi Petropavl qalalyq PB PPB komandıri Qanat Álimjanov.
