Petropavldyq aýlasyna 400 túp qarasora ekken
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavldaǵy Zarechnyı kentiniń 48 jastaǵy turǵyny aýlasynda qarasora ósirgen. Tártip saqshylary onyń jylyjaıynan arnaıy ydysta ósip turǵan 400-den astam túp esirtki ósimdigin tapty.
«Úı ıesiniń aıtýynsha, jylyjaıdy ol arnaıy qarasora ósirý úshin turǵyzǵan. Qumyraǵa egip, aptasyna bir ret sýarǵan. Sondaı-aq, úıinen tabylǵan ósimdik tuqymdary da osy faktini rastaıdy», - deıdi SQO PD bastyǵynyń orynbasary Rýslan Nazarov.
Polıtseıler jylyjaıdan 80 túp, aýladan taǵy 355 túp qarasora tapty. Sonymen qatar, tintý barysynda túrli kalıbrdegi qarý jáne travmatıka patrony, ańshy qarýynyń magazıni men optıkalyq kózdeýish tabyldy.
Qazir quramynda esirtki zaty bar, ósirýge tyıym salynǵan ósimdikterdi zańsyz ósirý deregi boıynsha sotqa deıingi tergeý júrgizilýde. Ustalǵan er adamnyń aıtýynsha, ol ósimdikti jeke maqsatta paıdalaný úshin ósirgen, al qarý-jaraqty qaraýsyz qalǵan ǵımarattan taýyp alypty. Polıtseıler sotqa deıingi tergeý barysynda barlyq aqparatty tekseredi.
Aýladan tabylǵan qarasora tolyq joıyldy. Keptirilmegen 5 keli 90 gram marıhýana tárkilendi. Bul asa iri kólemge jatady. Sot-ballıstıkalyq saraptama taǵaıyndaldy. Turǵyn oq-dárini zańsyz saqtaýǵa qatysty jaýapkershilikke tartylady.