Petropavldy Reseıge qosýdy suraǵan áıel 3 jylǵa sottaldy
Soltústik Qazaqstan oblystyq sotynyń málimetinshe, Petropavl qalalyq soty QR Qylmystyq kodeksiniń 180-baby 2-bóligi «Telekommýnıkatsııa jelilerin paıdalana otyryp, Qazaqstan Respýblıkasynyń birtutastyǵyn, onyń aýmaǵyna qol suǵylmaýyn jáne bólinbeýin buzýdy nasıhattaý» boıynsha S.- ǵa qatysty qylmystyq isti qarady.
«Petropavl turǵyny 2021 jylǵy 6 qyrkúıek kúni shamamen saǵat 22.00-de ápkesiniń uıaly telefonyn paıdalana otyryp, beınebaılanys arqyly álemniń túkpir-túkpirinen paıdalanýshylardyń anonımdi qarym-qatynasyna arnalǵan «Chat Rýletka» qosymshasyna kirgen. Kezdeısoq qosylý nátıjesinde buryn tanys emes er adammen onlaın áńgime bastaǵan.
«Chat Rýletka» qosymshasyndaǵy beınebaılanys arqyly áńgimelesý barysynda S. kezdeısoq paıdalanýshy-áńgimelesýshiniń suraqtaryna Soltústik Qazaqstan oblysynyń Petropavl qalasyn Reseı Federatsııasynyń quramyna alýyn ótine bastaǵan. Er adam áńgimelesýdi jazyp alyp, sol kúni jazbany YouTube beınehostınginde jarııalady», - delingen baspasóz habarlamasynda.
Prokýror S.-ny 6 jylǵa bas bostandyǵynan aıyrýdy, qylmystyq-atqarý júıesiniń qaýipsizdigi ortasha mekemesinde jazasyn óteýdi taǵaıyndaýdy surady. Sottalýshy kináni ishinara moıyndady. Aıyptalýshynyń kinási tolyq dáleldendi.
Nátıjesinde Petropavl qalalyq soty S.-nyń jubaıy 1-toptaǵy múgedek ekendigin jáne onyń jas balasynyń bolýyn eskerip, oǵan 3 jylǵa bas bostandyǵynan aıyrý jazasyn taǵaıyndady. Jazasyn qylmystyq-atqarý júıesiniń ortasha qaýipsizdik mekemesinde óteıtin bolady.
