«Petropavldy «Qyzyljar» dep ózgertetin kez jetti» - respýblıkalyq basylymdarǵa sholý

***

Táýelsiz Qazaq eliniń qalalarynda memlekettik tilge muryn shúıire qaraıtyn, tipti turǵylyqty ulttyń namysyn taptaıtyn ataýlar bolmaýǵa tıis. «Aıqyn» gazetiniń jazýynsha, keshe, Til merekesi kúni ultjandy bir top depýtat Úkimet basshysy Kárim Másimovke resmı saýalmen júgindi. Májilis depýtattary Soltústik Qazaqstan oblysynyń ortalyǵy Petropavl qalasynyń ataýyn Qyzyljar dep ózgertetin kez jetkendigin shegeleıdi. «Ázirge Úkimettiń qalaı ún qatary beımálim. Biraq osyndaı usynys Ult kóshbasshysy tarapynan endigi qoldaý tapqan: «Elimizdiń zııaly qaýymy birazdan beri Petropavl, Pavlodar sekildi qalalardyń ataýlaryn ózgertsek degen usynystar aıtyp júr, - degen bolatyn jýyrda Elbasy BAQ-qa bergen suhbatynda, - Lenıngrad, Stalıngrad, Ýlıanovsk sekildi qalalar, basqa da jer attary ózgerip jatqanda, bul da oryndy usynys shyǵar» degen N.Nazarbaev «jergilikti ákimdikter men máslıhat depýtattaryna oılasýǵa» keńes bergen», dep jazady basylym. Maqalanyń tolyq nusqasyn oqyǵyńyz kelse, búgingi nómirdegi «Petropavldy «Qyzyljar» dep ózgertetin kez jetti» degen maqalaǵa nazar salyńyz.

Taıaýda Qarjy mınıstri Bolat Jámishev 2011 jyldan bastap qoldanystaǵy salyq júıesine engiziletin ózgerister jaıly málimdeme jasady. Onyń aıtýynsha, jańa jyldan bastap tabys salyǵy údemeli (progressıvnyı) júıege kóshetin bolady. Dálirek aıtqanda, aılyǵy 250 myń teńge bolatyndar burynǵysha on paıyzdyq, 250 myń teńgeden 500 myń teńgege deıin jalaqy alatyndar on bes paıyzdyq, al 500 myń teńgeden joǵary jalaqy alatyndar jıyrma paıyzdyq tabys salyǵyn tóleıdi. Osy jaıtty tereńnen qaýzaǵan «Aıqyn» gazeti atalǵan júıeniń birqatar kemshilikterin jipke tizip shyǵa kelip, «qoryta aıtqanda, mınıstr Bo­lat Jámishev myrza usynǵan tabys salyǵynyń údemeli júıesin dál osy qalpynda jańa jyldan bastap óndiriske engizetin bolsaq, onda opyq jeımiz. Birinshiden, sha­ǵyn jáne jeke kásipkerliktiń da­mýyna tosqaýyl qoıamyz. Ekin­shiden, kóleńkeli ekonomıka bo­lýy­na ózimiz jol ashyp beremiz», dep túıindepti. Jarııalanym «Jámishev neni eskermedi?» degen taqyryppen basylǵan.

Osy basylymnyń «Júrektiń kózi» aıdarynda aıtysker aqyn Serikzat Dúısenǵazınmen aradaǵy suhbat «Aıtystyń ınternetke shyǵa bergeni durys» degen taqyryppen berilgen. Basylymnyń barlyq saýaldaryna egjeı-tegjeıli jaýap bergen ol «aıtys telearnalardan tara­tylmaı tursa da, ınternetke shyǵa bergeni durys dep oılaı­myn. Aıtystyń mátinderin ga­zetke jarııalaý, aıtysty dıskige shyǵarý, ınternet aıtys uıym­dastyrý halyqqa qajet dúnıe. Qazir kóp adamnyń gazet oqýǵa, tipti teledıdar qaraýǵa murshasy joq. Al ınternetti bári paıda­lanady jáne ınternetti dúnıeniń kez kelgen buryshynan ashyp kórýge bolady», depti.

***

«Aralas neke qazaqqa asa tańsyq emes. Óıtkeni ótken ǵasyrdyń alǵashqy jartysynda qazaq zııalylarynyń kópshiligi orys, ýkraın, balgar jáne taǵy basqa ózge ult ókilderiniń qyzdarymen kóńil jarastyryp, otaý qurǵany tarıhı shyndyq. Munyń ózindik sebebi de bar. Bir jaǵynan, bul yntymaqtastyqtyń bir túri bolsa, ekinshi jaǵynan, sol dáýirde kórkine bilimi saı qazaq arýlary ilýde bireý edi. Áıtse de, japatarmaǵaı jat jurtpen qudandaly bolý dál búgingideı etek jaıǵan emes», dep jazady «Nur Astana» gazeti búgingi nómirinde jarııalanǵan «Aralas neke alysqa aparmaıdy» degen maqalasynda. Basylymnyń atap ótýinshe, Batys Qazaqstan oblysynda ótken jyldyń 11 aıynda 652 adam ózge ult ókilderimen neke qurǵan. Osy merzim ishinde oblysta 10308 náreste dúnıe esigin ashsa, sonyń 854-iniń ákesi ózge ult ókilderi eken.

***

«Astana aqshamy» gazetiniń jazýynsha, keshe qalalyq máslıhat depýtattary 2008-2010 jyldarǵa arnalǵan memlekettik turǵyn úı qurylysyn damytýǵa arnalǵan baǵdarlamanyń júzege asyrylý barysymen taǵy bir márte tanysqan. Kún tártibinde osy jáne ózge de máseleler pysyqtalǵan kezekti 52-shi sessııaǵa Astana ákimi Imanǵalı Tasmaǵambetov qatysqan. Alqaly jıyn jaıynda basylymnyń búgingi nómirindegi maqaladan jan-jaqty tanys bola alasyzdar.

***

«Keshe Memleket basshysy Nursultan Nazarbaev Premer-Mınıstrdiń birinshi orynbasary Ómirzaq Shókeevti qabyldady», dep jazady «Kazahstanskaıa pravda» gazeti QR Prezıdentiniń baspasóz qyzmetine silteme jasap. Basylymnyń atap ótýinshe, Ó.Shókeev Prezıdentti Qazaqstannyń úkimettik delegatsııasynyń Qazaqstannyń DSU-na kirýi týraly másele boıynsha kelissózder júrgizilgen AQSh-qa saparlarynyń qorytyndylary týraly habardar etken. «Kelissózder úsh baǵytta: taýarlar toby, saýda qyzmeti jóninde jáne júıeli máseleler boıynsha júrgizilýde. Saýda taýarlary jónindegi kelissózder aıaqtalýǵa jaqyn - tek tehnıkalyq jumystar qaldy. Saýda qyzmeti jóninde - biz búgingi kúni qalyptasqan birneshe problemalyq máselelerdi sheshýdiń joldaryn belgiledik. Al júıeli máselelerge qatysty aıtsaq, biz úshin eń mańyzdy másele qazaqstandyqtardy qamtý ekijaqty kelissózder aıasyna engizildi jáne kóp jaqty formatqa aýystyryldy. Bul biz úshin iri jetistik bolyp tabylady», - degen jýrnalısterge arnalǵan brıfıngte Ó.Shókeev.