Petropavldy kógaldandyrýǵa shamamen 30 mln teńge qarjy jumsalady
PETROPAVL. QAZAQPARAT - Petropavldy kógaldandyrý baǵdarlamasy qala turǵyndary arasynda túrli pikir týdyrdy, dep habarlaıdy QazAqparat tilshisi.
Beıbitshilik jáne Abaı kóshelerinde birneshe kún boıy terekter men úıińkilerdi kesý jumystary júrgizilip jatyr. Olardyń oryndarynda jas shyrshalar ósirilip, tiri qorshaýlar paıda boldy dese bolatyndaı. Keıbir qala turǵyndary aǵashtardy kesýge narazylyqtaryn bildirip jatyr, tipti petıtsııaǵa qol jınaýǵa kiriskender bar. Qalǵan turǵyndar ózgeristerdi qoldap otyr. Qala bıligi ókilderiniń aıtýynsha, olar jazǵy mamyqtardyń joıylǵany úshin alǵystaryn aıtýda.
«Bul jyly shamamen 5 myń kóshet, ıaǵnı, shyrshalar, qaraǵaılar, qaıyńdar, sheten aǵashyn otyrǵyzamyz degen oıdamyz, sondaı-aq bórijıdekten, aq shymnan, jabaıy almadan, shegirshinnen 35 kılometr butaly qorshaý jasaý josparlanyp otyr. Osy kúnge deıin shamamen myń aǵashtan 3 kılometrdeı qorshaý otyrǵyzyldy. Qaraǵaılar Tabıǵı resýrstar jáne tabıǵat paıdalanýdy retteý basqarmasymen bólingen aımaqtarda daıyndalady. Kondratovskıı orman tálimbaǵymen kelisimshart jasaldy. Olardan shym, bórijıdek alamyz. Jabaıy alma aǵashyn kútimsiz qalǵan saıajaı oryndarynan ákelemiz», - dedi Petropavl qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi basshysynyń orynbasary Dýlat Sharapıdenov.
Qala turǵyndarynyń narazylyq bildirýleriniń birden-bir sebebi - aldyńǵy jyly otyrǵyzylǵan shyrshalardyń bir bóliginiń qurap ketýi boldy. Petropavldyqtar qylqan japyraqty aǵashtar jol boıyna ońaı tamyr tartpaıtynyna jáne olardyń otyrǵyzylýyna memlekettik qazynadan bólingen qarjy bosqa jumsalǵanyna senimdi.
D.Sharapıdenov egilgen qylqan japyraqty aǵashtardyń 75-80% tamyr tartqanyn aıtady. Sonymen qatar qalany kógaldandyrýdyń aldynda sheneýnikter Kondratovskıı orman tálimbaǵynan shaqyrtý alǵan dendrologpen aqyldasqan.
Onyń aqparaty boıynsha, qalany kógaldandyrýǵa 30 mıllıon teńge shamasynda qarjy jumsalatyn bolady. Sonyń ishinde 7 mıllıon teńge kóshetterdi satyp alýǵa arnalady. Kóktemgi egis egýdi 20 mamyrǵa deıin aıaqtaý josparlanýda.
