Petropavldyń kóshesi Gınnes rekordtar kitabyna enýi múmkin
PETROPAVL. KAZINFORM – Petropavldaǵy Qazaqstan Konstıtýtsııasy kóshesi beıresmı túrde álemdegi eń uzyn jaıaý júrginshiler kóshesi bolyp sanalady.
Onyń uzyndyǵy – 2,4 km. Petropavl ákimdigi kósheni Gınnestiń rekordtar kitabyna engizý maqsatynda qajetti qujattardy ázirlep, resmı ótinim joldady.
Qazir bul rekord Qytaıdyń Harbın qalasyndaǵy Chjýnıan Datsze kóshesine tıesili. Onyń uzyndyǵy – 1,2 km.
Qazaqstan Konstıtýtsııasy kóshesi – Petropavldyń tarıhı kelbetin aıqyndaıtyn negizgi oryndardyń biri. Kóshe boıynda XIX ǵasyrdan saqtalǵan ǵımarattar bar. Olardyń birqataryna tarıhı eskertkish mártebesi berilip, memleket qorǵaýyna alynǵan.
Tarıhı derekterge súıensek, bul ǵımarattardyń basym bóligi sol kezeńdegi kópesterdiń úıi bolǵan. Máselen, Qazaqstan Konstıtýtsııa kóshesi, 18 mekenjaıyndaǵy eki qabatty úı 1890 jyly boı kóterip, kópes Chýkanovqa tıesili bolǵan.
Al osy kóshedegi kópes Strelovtyń úıinde qazir oblystyq tarıhı-ólketaný mýzeıi ornalasqan.
Qazir kóshe kúrdeli jóndeýden ótip jatyr. Úsh jylǵa shaqtalǵan joba aıasynda 20 myń sharshy metrden astam kespetas jańartylady. Sonymen qatar kóshe jaryǵy, ınjenerlik jáne basqa da ınfraqurylym kezeń-kezeńimen aýystyrylyp jatyr.
- Kóshe naýryz aıynda qabyldanǵan dızaın-kod talaptaryna sáıkes jańartylyp jatyr. Kespetas tóselip, kóshe jaryǵy ornatyldy. Sonymen qatar ınfraqurylymdy tsıfrlandyrý jumystary júrgizilip jatyr. Jańǵyrtý kezinde kósheniń tarıhı sáýletin saqtaýǵa basymdyq beriledi, - dedi Petropavl ákimi Serik Muhamedıev.
Búginde Qazaqstan Konstıtýtsııasy kóshesi qala turǵyndary men qonaqtary jıi baratyn mádenı jáne týrıstik ortalyqtardyń birine aınalǵan.
Jańartylǵannan keıin serýendeýge, demalýǵa jáne túrli mádenı is-sharalar ótkizýge arnalǵan zamanaýı qoǵamdyq keńistikke aınalmaq.
Buǵan deıin Atyraý oblysyndaǵy eki jaqta 28 jol belgisi turǵan «erekshe kóshe» týraly jazǵan edik.
