Petropavldyń dızaın-kody qabyldanbaı, ázirleýshilerge keri qaıtaryldy

PETROPAVL. KAZINFORM — Petropavldyń jańa dızaın-kody qala qurylysy keńesine qatysýshylardyń kóńilinen shyqpady.

Petropavl ákimdiginde ótken jıynda pavlodarlyq kompanııa dızaın-kodtyń tanystyrylymyn jasady. Ol boıynsha jergilikti jerdiń ereksheligi eskerilip, qalanyń syrtqy kelbeti, ǵımarattardyń qasbetteri, jarnamalar men mańdaıshalar, sondaı-aq kishi sáýlettik nysandar biryńǵaı stılde, belgili bir standarttar men tústik úılesimge sáıkes ázirlenip, qalyptastyrylýy tıis. Sondaı-aq, mátinniń eki tilde durys aýdarylýy da mańyzdy.

Petropavl qalalyq máslıhatynyń depýtaty Zákirjan Mamlıýtov bul týraly áleýmettik jelidegi paraqshasynda jazba qaldyrdy. 

— Biz, Petropavl qalasynyń depýtattary, qala dızaın-kodyn ázirleýge arnalǵan bıýdjet jobasyn maquldaǵanymyzǵa eki jarym jyl ótti. Bul maqsatqa bastapqyda 80 mln teńge bólingen. Keıinirek bul soma azaıtyldy. Nátıje qaıda?

Búgin qala qurylysy keńesiniń otyrysynda Pavlodar qalasynan kelgen kompanııa baıandama jasady. Bul uıym Petropavldyń dızaın-kodyn ázirleý boıynsha konkýrs jeńimpazy bolǵan. Meniń oıymsha, bul jaǵdaı — memlekettik satyp alýlar júıesiniń álsiz tustarynyń biri.

Óıtkeni bizde ózimizde bilikti mamandar jetkilikti. Olar qalanyń ereksheligin, bolmysyn, ishki rýhyn, tynysyn jaqsy biledi, — deıdi Zákirjan Mamlıýtov.

Depýtattyń aıtýynsha, ázirleýshiler jobany júzege asyrýǵa júrdim-bardym qaraǵan.

— Petropavldyń dızaın-kodyna qandaı tústerdi tańdaǵandaryn da aıta almady. Petropavl zamanaýı ári tanymal kelbetke ıe bolýy kerek, ol qalanyń tarıhyn, klımatyn jáne rýhyn beıneleýi tıis.

Qalanyń ár aýdany jaıly, al ǵımarattardyń mańdaıshalary biryńǵaı stılde oryndalǵan bolsa deımiz. Qasbetterdiń tústeri kózge jaǵymdy bolǵanyn qalaımyz, — dedi Zákirjan Mamlıýtov.

Petropavl qalalyq ákimdiginiń málimetinshe, 2024 jylǵy 26 qyrkúıekte Pavlodardaǵy «INNOVATION CENTER PROJECT» JShS jobalaý uıymymen Petropavl qalasynyń dızaın-kodyn ázirleý boıynsha kelisimshart jasaldy. 1,5 jyl ýaqyt berildi. Qazirgi ýaqytta tek tehnıkalyq bóligi oryndaldy.

Qurylys, sáýlet jáne qala qurylysy bólimi basshysynyń orynbasary Sáken Ótebaevtyń aıtýynsha, keńeske qatysýshylar turǵyn úılerdiń qasbetterin, sonymen qatar magıstraldar men negizgi kósheler boıyndaǵy jarnamalyq mańdaıshalardyń ornalasýyn naqty mysaldary arqyly kórgisi keldi.

— Jobanyń tehnıkalyq bóligi jasaldy, ol ári qaraı tolyqtyrylyp, qalany vızýalızatsııalaý jumysy júrgiziledi. Qala qurylysy keńesine ǵımarat qasbetteriniń, jarnamalyq mańdaıshalardyń, ýaqytsha qurylystar men abattandyrý elementteriniń kórinisteri usynylmady.

Qala qurylysy keńesi dızaın-kodtyń ázirlenýin baqylaýda ustap otyr. Materıaldar túsken saıyn olardy qurylys bólimi qala qurylysy keńesi men qoǵamdyq keńestiń sarapshylaryna zerdeleý jáne usynystar engizý úshin joldaıtyn bolady. Barlyq eskertý men usynystar qaralady, — deıdi Sáken Ótebaev.

Buǵan deıin Almatynyń bas josparyna túzetý engiziletinin jazǵan edik.