Petropavldyń 25 jastaǵy turǵyny 2 keliden astam gashıshpen ustaldy
Petropavlda esirtki taratyp, satty degen kúdikpen 25 jastaǵy jigit ustaldy. Endi ol 15 jylǵa deıin bas bostandyǵynan aıyrylýy múmkin, dep habarlaıdy Kazinform.
Soltústik Qazaqstan oblysy polıtsııa departamenti baspasóz qyzmetiniń málimetinshe, soltústikqazaqstandyq polıtseıler 25 jastaǵy petropavldyq azamatty ustap, onyń jaldamaly páterinen «dozalarǵa» bólingen ósimdik tektes zat salynǵan 100 polımerlik paket tárkiledi. Saraptama bunyń gashısh ekenin kórsetti. Tárkilengenniń jalpy salmaǵy 2 keliden asty.
Atalǵan fakti «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha Sotqa deıingi tergep-tekserýlerdiń biryńǵaı tizilimine engizildi.
«Kúdikti iri kólemdegi esirtki partııasyn arnaıy jasyrylǵan orynnan alǵan. Atalǵan azamat qazirgi ýaqytta qamaýǵa alyndy, tergeý júrip jatyr. Gashıshtiń asa iri mólsheri 200 gramnan bastalatynyn esterińizge salamyz. Bul baptyń sanktsııasy 15 jylǵa deıin bas bostandyǵynan aıyrý jazasyn kózdeıdi», - deıdi SQO PD Esirtki qylmysyna qarsy is-qımyl basqarmasynyń bastyǵy Rýslan Saparov.
Mamandardyń aıtýynsha, búgingi tańda sıntetıkalyq esirtkiler «qara naryqta» basqa esirtki zattaryn ysyryp, keńinen qoldanylady. Ósimdik tektes esirtkilerge qaraǵanda sıntetıkalyq esirtkilerdiń adamnyń psıhıkasyna tıgizer zııany óte aýyr.
Jalpy SQO polıtseıleri jyl basynan zańsyz aınalymnan 730 keliden astam túrli esirtki zattaryn tárkilep aldy, onyń 708 keliden astamy marıhýana men keptirilmegen qarasora jáne 20,5 keliden astamy gashısh pen 2,2 keliden astamy sıntetıkalyq psıhobelsendi zattar.
