Petropavldyq oqýshy balalardyń oı-órisin damytatyn matematıkalyq oıyn jasap shyqty
PETROPAVL. KAZINFORM – Petropavldaǵy Maǵjan Jumabaev atyndaǵy IT mektep-lıtseıiniń 7-synyp oqýshysy bastaýysh synyp balalaryna arnalǵan kompıýterlik oıyn qurastyrdy.

Soltústik Qazaqstan oblysy bilim basqarmasy baspasóz qyzmetiniń málimetinshe, sabaqta qosymsha qural retinde paıdalanýǵa bolatyn oıyn «Oılan, tap» dep atalady.
Avtory Maǵjan Jumabaev atyndaǵy IT mektep-lıtseıiniń 7-synyp oqýshysy — Álıhan Aqylbaı.
— Oıyn barysynda balalar óz synybyna oraı matematıkalyq amaldardy tańdap, esepter shyǵarady. Eger jaýap durys bolsa, «Jaraısyń!» degen motıvatsııalyq jazý shyǵady. Tek durys jaýap bergende ǵana kelesi deńgeıge ótýge múmkindik bar, - deıdi jas ónertapqysh.

Álıhan bul jobany bastapqyda ınformatıka sabaǵynda bastap, keıin matematıka pánine beıimdegen eken.
— Tsıfrlandyrý dáýirinde balalardyń da ınnovatsııalyq jobalarǵa atsalysýy tańǵalarlyq jaǵdaı emes. Bul oıynda Álıhan geımıfıkatsııa elementterin qoldandy. Joba balalardyń logıkalyq oılaý qabileti men matematıkalyq bilimin arttyrýǵa negizdelgen, - deıdi ınformatıka páni muǵalimi Merýert Beksultanova.
Qazir Álıhannyń jobasy bastaýysh synyp oqýshylarynyń matematıkalyq qabiletterin damytýda qoldanylyp keledi. Ustazdardyń aıtýynsha, endi balalar kúrdeli esepterdi úırenshikti ádispen emes, tanymal mýltfılm keıipkerleri bar qyzyqty oıyn arqyly sheshedi. Bul tásil oqýshylardyń sabaqqa degen qyzyǵýshylyǵyn arttyryp qana qoımaı, materıaldy tez ári jeńil qabyldaýǵa kómektesedi.
Buǵan deıin taza sý máselesin sheshý jolyn usynǵan Petropavldaǵy mektep oqýshysy Álıhan Jarov týraly jazǵan edik.