Petropavldyq muǵalim Gınness rekordtar kitabyna endi
PETROPAVL. KAZINFORM — Petropavlda dene shynyqtyrý pániniń muǵalimi Anatolıı Vıselskıı eki saýsaqpen kermede tartylyp turý boıynsha álemdik rekordty jańartty.
Osylaısha ıtalııalyq sportshy Marchello Ferrıdiń nátıjesin jańartty. Ferrı 2 mınýt 1 sekýnd tursa, Vıselskıı 2 mınýt 7 sekýnd ýaqytqa deıin ilinip, burynǵy rekordtan asyp tústi.
Anatolıı Vıselskıı Taıynsha aýdany Makashevka eldi mekeniniń týmasy.
11-synyptan keıin M.Qozybaev atyndaǵy Soltústik Qazaqstan ýnıversıtetiniń dene shynyqtyrý fakýltetine oqýǵa túsedi. Joǵary oqý ornyn támamdaǵannan keıin týǵan aýylyna kelip, mektepte 6 jyl dene shynyqtyrý pániniń ustazy boldy.
Keıin Petropavldaǵy № 5 orta mektepke mamandyǵy boıynsha muǵalim bolyp ornalasady.
— Oıda-joqta osy sport túrinen rekord jasaǵandar bar ekenin bildim. Birinshi retten-aq álemdik rekordtyń nátıjesin qaıtaladym. Al eki aptadan keıin Gınness rekordyn jańarttym.
Qyrkúıek aıynda ótinish berip, jarty jyldan keıin sertıfıkatty qolyma alyp otyrmyn. Resmı túrde Gınness rekordtar kitabyna endim, — deıdi petropavldyq ustaz.
Anatolıı bala kezinen sportqa jaqyn. Voleıbol, fýtbol, basketbol, ústel tennısin oınap ósedi.
Sonymen qatar aýyl mektebindegi shaǵyn trenajer zalynda jıi jattyǵyp, beltemirge tartylyp, túrli jattyǵýlarǵa erekshe kóńil bólgen.
— Rekordty jańartý úshin eki aptadan artyq tynymsyz jattyqtym. Eki saýsaqpen ilinip turý ońaı emes, terisi jyrtylady, aýyrady. Ekiniń biriniń qolynan kele bermeıdi, erik-jiger bolýy kerek. Meniń bala kezden sportpen shuǵyldanýym nátıje berdi.
Oqýshylarym da, áriptesterim de quttyqtap jatyr, únemi qoldap otyrady. Balalarǵa jetistikke jetý úshin qıyndyqqa moıymaý kerektigin aıtyp otyramyn. Ol tek sportqa ǵana qatysty emes. Maqsat qoıyp, soǵan jetý kerek, — deıdi mektep muǵalimi.
Buǵan deıin Novak Djokovıch erekshe rekord ornatqanyn jazǵan edik.