Petropavldy jańajyldyq bezendirýge bıýdjetten qarjy bólinbeıdi

PETROPAVL. KAZINFORM – Bıyl Petropavldy merekege oraı bezendirýdiń biryńǵaı tujyrymdamasy bekitildi.

Qala ákimi baspasóz qyzmetiniń málimetinshe, oblys ortalyǵynda «qysqy ertegi» stılinde jańajyldyq 10 negizgi alań paıda bolady.

Merekege oraı basty shyrsha Qazaqstan Konstıtýtsııasy kóshesinde – qalalyq, oblystyq ákimdikterdiń aldyndaǵy alańdarda qurylyp jatyr. 

– Qalalyq ákimdik aldyndaǵy alań negizgi otbasylyq demalys ortalyǵyna aınalady. Munda muz aıdyny quıylady. Sondaı-aq keler jyldyń belgileri bar jaryq shamdary qoıylady. Aıaz Ata men Aqshaqar músinderi, túrli fotoaımaqtar, shaǵyn sáýlet qurylymdary ornatylady. Úlken syrǵanaq jasaý da josparlanǵan. Oblystyq ákimdik aldyndaǵy alańda shyrshadan bólek dekoratıvtik kompozıtsııalar, jármeńke aımaqtary, úlken syrǵanaq ornalasady, - dedi Petropavl ákiminiń baspasóz hatshysy Tımýr Jumanov.

Qaladaǵy basty jaıaý júrginshiler kóshesin bezendirýde jaryq ınstallıatsııalary men shaǵyn sáýlettik formalar keńinen qoldanylmaq. 

Jeńis saıabaǵynda ár jastaǵy balalarǵa arnalǵan eki syrǵanaq salynyp, Jańa jyldyq shyrshamen bezendiriledi. 

Budan bólek, «Birlik» shaǵyn aýdanyndaǵy saıabaqta, «Pestroe» kóli aýmaǵynda da úlken syrǵanaqtar paıda bolady. «Bereke» shaǵyn aýdany da jańa jylǵa oraı bezendirilip, turǵyndarǵa merekelik kóńil kúı syılamaq. 

– Dástúr boıynsha bıyl da qalany bezendirýge bıýdjetten qarjy bólingen joq. Buǵan deıin qoldanysta bolǵan qurylymdardy paıdalanamyz. Jańajyldyq bezendirýge demeýshiler barynsha at salyspaq, - dedi Tımýr Jumanov. 

Buǵan deıin Túrkistanda jańajyldyq bezendirýge qansha qarjy jumsalatynyn jazǵan edik.