Petropavldan Nur-Sultanǵa bılet quny 4 myń teńgelik jańa áýe reısi ashylmaq
PETROPAVL. QazAqparat – Petropavl halyqaralyq áýejaıy Almatydan ushyp kelgen FlyArystan kompanııasynyń alǵashqy reısin qarsy aldy, dep habarlaıdy QazAqparat tilshisi.
Búgin tańerteń tańǵy 8.00 shamasynda alǵashqy reıs Almatydan Petropavlǵa ushyp keldi. Bir baǵytqa bılettiń quny – 10 myń teńge shamasynda.
FlyArystan kompanııasy baspasóz qyzmetiniń málimetinshe, bıýdjettik áýe kompanııasynyń ushaqtary aptasyna 4 ret: dúısenbi, sársenbi, juma, jeksenbi kúnderi sapar shegetin bolady. Ushý ýaqyty – 2 saǵat.
Qazirgi ýaqytta FlyArystan-da Airbus A320 4 avıalaıneri bar. Olar 12 ishki baǵytty jáne Nur-Sultan – Máskeý – Nursultan reısin qamtamasyz etedi.
«Búgin ashyp otyrǵan jańa baǵyt qalalyqtar arasynda ǵana emes, jalpy óńir turǵyndary úshin de suranysqa ıe bolady dep oılaımyn. Jolaýshy sany kóbeıgen jaǵdaıda qosymsha reıster ashýǵa múmkindigimiz bar. Soltústik Qazaqstan oblysynyń ákimdigi men Petropavl halyqaralyq áýejaıynyń osy reıstiń ashylýyna alǵashqy kúnnen-aq qoldaý kórsetkenin aıtqymyz keledi. Sondaı-aq jolaýshylarǵa arzan bıletke qol jetkizý úshin aldyn ala satyp alý qajettigin eske salamyz», - deıdi FlyArystan kompanııasynyń basqarýshy dırektory Tım Djordan.
Al, 10 sáýirden bastap Petropavl men Nur-Sultan qalalarynyń arasyn jalǵaıtyn jańa reıs ashylmaq. Bıletter búginde satylymǵa shyqty. Quny – 3999 teńge.
Mamandardyń aıtýynsha, ushaq juma, jeksenbi kúnderi keshke qaraı ushady. Jolǵa bir saǵat shamasynda ýaqyt ketedi.
