Petropavldan Mysyr eline tikeleı áýe reısi ashylady

PETROPAVL. KAZINFORM – 2 shildeden bastap Petropavldan Sharm-esh-Sheıh qalasyna tikeleı halyqaralyq áýe reısi qaıta jandanady.

Bul týraly óńirdegi týrıstik agenttikter habarlady. 

Bul baǵyt boıynsha reısterdi áýe kompanııasy Boeing 737 max9 ushaǵymen oryndaıdy. Ushaq 213 jolaýshyǵa eseptelgen. Ushý ýaqyty – shamamen 6 saǵat 30 mınýt bolmaq.

Osylaısha jazǵy demalysyn Qyzyl teńiz jaǵalaýynda ótkizgisi keletin turǵyndar úshin bul óte tıimdi bolmaq. Óıtkeni buǵan deıin óńir halqy shetelge demalysqa negizinen Astana arqyly ǵana ushatyn. Týr baǵasy men naqty málimetterdi týroperatorlardan naqtylaýǵa bolady.

Soltústik Qazaqstan oblysy jolaýshylar kóligi jáne avtomobıl joldary basqarmasynyń málimetinshe, 1 shildeden bastap «Almaty – Petropavl - Almaty» áýe reısi kommertsııalyq negizge kóshiriledi. Buǵan deıin bul baǵyt boıynsha reısterge bes aı – aqpannan maýsymǵa deıin sýbsıdııa bólingen edi.

- Áýe baǵyttaryn sýbsıdııalaý qaǵıdalarynyń 16-tarmaǵyna sáıkes, eger 6 aı boıy áýe reısteriniń ortasha aılyq júktemesi áýe kemesiniń kommertsııalyq ótkizý qabiletiniń 80% jáne baǵyt shyǵynsyz bolsa, ol sýbsıdııasyz, ıaǵnı kommertsııalyq negizge aýystyrylady. Bul talaptarǵa «Almaty – Petropavl – Almaty» baǵyty tolyq sáıkes keledi – reısterdiń júktemesi 80%-dan joǵary.

Jolaýshylar úshin bıletterdiń baǵasy shamamen 27 000–50 000 teńge aralyǵynda bolmaq. Bul baǵa áýe kompanııasynyń ishki tarıftik saıasatyna sáıkes retteledi. Tolyq aqparatty tikeleı áýe kompanııasynyń resmı arnalarynan bilýge bolady, - dep jaýap berdi basqarmadaǵylar.

Óńir basshylyǵy osy baǵytty ári qaraı sýbsıdııalaýdy jalǵastyrý máselesin qarastyrý úshin Kólik mınıstrligine tıisti suranys joldaǵan.

Qazirgi ýaqytta Qyzyljar halyqaralyq áýejaıy arqyly Astanaǵa, Almatyǵa jáne Shymkentke áýe reısteri bar. Petropavldan Almatyǵa ushý - 30 myń teńge, Astanaǵa - 18 myń teńge jáne Shymkentke ushý baǵasy 28 myń teńge turady. 

Buǵan deıin Astana-Samarqand baǵyty boıynsha jańa áýe reısi ashylǵanyn jazǵan edik.