Petropavldan qys bastalǵaly 300 myń tekshe metrge jýyq qar shyǵaryldy

PETROPAVL. QazAqparat – Petropavldy qardan arshýǵa kúndelikti 150 tehnıka jumyldyrylady. Qys bastalǵaly qaladan 300 myń tekshe metrge jýyq qar shyǵarylǵan, dep habarlaıdy QazAqparat tilshisi.

Petropavl qalalyq turǵyn úı-kommýnaldyq sharýashylyǵy, jolaýshylar tasymaly jáne avtomobıl joldary baspasóz qyzmetiniń málimetinshe, oblys ortalyǵynda kúndelikti keshki saǵat 23.00-den tańǵy saǵat 5.00-ge deıin kommýnaldyq qyzmet kóshelerdi tazalaıdy. Joldar men trotýarlardy qardan arshýǵa 150 tehnıka jumyldyrylǵan. Budan basqa jumysshylar da kósheniń muzyn oıýǵa tartylǵan.

Bıyl óńirde qar az. Desek te qys bastalǵaly kommýnaldyq qyzmet qala ishinen 300 myń tekshe metrge jýyq qar shyǵarǵan.

«Bıyl bas merdiger kompanııa ózgerdi, jumysty «Blagoýstroıstvo Sever» JShS-gi atqarady. Qala 9 aýdanǵa bólingen. Shahardan shyǵarylǵan qar 4 qoqys alańyna tógiledi. Jeke sektordaǵy qala turǵyndary, jeke kásipkerler Shahovskoe aýylynyń mańyndaǵy polıgonǵa qar shyǵara alady, ol alań táýlik boıy jumys isteıdi», - deıdi baspasóz hatshysy Ásem Aıtýlova.

Mamannyń aıtýynsha, kóshege sebýge, kóktaıǵaqpen kúreske 1,5 myń tekshe metr qum-tuz qospasy daıyndaldy. Jumystar qala turǵyndaryna kedergi keltirmeýi úshin túnde atqarylady. Alaıda jol boıynda qaldyrylǵan kólikter kommýnaldyq qyzmetterdiń jumysyn qıyndatyp otyr.