Petropavldan kelesi aptada blokpostar alynady
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov brıfıng ótkizip, Petropavlda kelesi aptadan bastap karantın rejımi jeńildetetinin jetkizdi, dep habarlaıdy QazAqparat tilshisi.
SQO ákimi Qumar Aqsaqalov brıfıngte shekteýler jaǵdaıdy tolyq baqylaýǵa alýǵa septigin tıgizip, karantındi kúsheıtý oń nátıje bergenin atap ótti.
«9 aıdan beri karantın rejıminde ómir súrip kelemiz. Bul kezeń eshkimge ońaı tıgen joq. Bárine túsinistikpen qaraǵan oblys turǵyndaryna alǵys aıtamyn. Qatań karantın - qajetti shara. Bir aı buryn qala jabylyp, PTR test bolmasa ótýge tyıym salyndy. Óńir turǵyndary ýaqytsha qıyndyq kórdi. Endi jaǵdaıdyń turaqtalýyna baılanysty 14 jeltoqsan saǵat 00:00-den bastap biz oblys ortalyǵyndaǵy karantın rejımin álsiretemiz. Petropavl qalasynyń mańyndaǵy beketter alynady», - dedi Qumar Aqsaqalov.
Budan basqa oblys ortalyǵynda demalys kúnderi qoǵamdyq kólik jumys istemek. Oblys boıynsha avtobýs qatynasy retke keledi.
Kitaphanalar, murajaılar, teatrlar, dinı nysandar qaıta ashylady.
Barlyq saýda ortalyqtary men azyq-túlik emes dúkender tańǵy saǵat 10.00 men keshki 22.00-ge deıin jumys isteıdi. Biraq jeksenbi kúni jabyq bolady. Saýda ortalyǵyndaǵy sýpermarketter saǵat 24.00–ge deıin ashylady. Jabyq bazarlar tańǵy saǵat 9.00-den 20.00-ge deıin jumys istese, ashyq bazarlardyń jumysyna shekteý qoıylmaıdy.
Demalys jáne mereke kúnderi sulýlyq salondary da klıentterdi qabyldaı alady. Dámhanalar men meıramhanalar ıeleriniń suraýy boıynsha jumys ýaqyty saǵat 22.00-ge deıin uzartyldy. Jeksenbi kúni tek tamaqty jetkizýmen ǵana aınalysa alady.
Qonaq úıler men týrızm nysandary tek 80 % tolýy kerek. Týrıstik nysandar, fıtnes jáne sport zaldary, basseınder, sporttyq nysandar, balalarǵa bilim berý mekemeleri jeksenbide ǵana jumys istemeıdi.
«Kóp shekteýler alynady, biraq vırýspen kúres toqtamaıdy. Ár adamnan jaýapkershilik kútemiz. Bárimiz jeke qaýipsizdik týraly oılaýymyz kerek. Otbasynyń aman-saýlyǵy birinshi orynda turýy tıis. Bizdi alda Táýelsizdik kúni merekesi kútip tur. Jańa jyl da jaqyndap qaldy. Meıramdardy úıde, otbasymen birge atap ótýge shaqyramyn», - dedi óńir basshysy brıfıngte.
Qumar Aqsaqalovtyń aıtýynsha, oblystaǵy jaǵdaı qalpyna kelip, aýyrǵandardyń sany odan saıyn azaısa, jeksenbilik shekteýler de alynyp tastalmaq.
