Petropavldaǵy «ZIKSTO» zaýyty jumysshylarynyń eńbekaqysy tólenetin boldy

PETROPAVL. QazAqparat - Petropavldaǵy «ZIKSTO» mashına jasaý zaýytynyń máselesi jaqyn arada sheshilip, jumysshylarynyń eńbekaqysy tólenetin boldy, dep habarlaıdy QazAqparat tilshisi.

«ZIKSTO» AQ kásipornynyń jumysshylary eki aıdan beri eńbekaqylaryn almaǵan. SQO ishki saıasat basqarmasynyń málimetinshe, bul jóninde zaýyttyń 5 jumysshysy Quqyq qorǵaý qyzmeti ortalyǵyna aryzdandy. Máselege Petropavl qalasynyń prokýratýrasy, eńbek ınspektsııasy aralasyp, zaýyt jumysshylar aldyndaǵy qaryzyn óteıtin boldy.

«Reseı memleketinen satyp alynatyn quramdas bólshekterdiń quny 2,5 esege qymbattap ketti. Buryn jasaǵan kelisimsharttarmen jumys isteý tıimsiz boldy. Bul másele jaqyn arada sheshilýi kerek. 2 aı boıynsha eńbekaqy qaryzymyz 95 mln teńgege jýyq. Al, elektr energııasy úshin 40 mln jýyq teńge bereshegimiz bar», - deıdi «ZIKSTO» AQ bas dırektory Rınat Shamsýtdınov.

Zaýyt basshysy jumysshylarmen kezdesip, máseleniń aı sońyna deıin sheshiletinin aıtty. Bul túıtkildi oblys ákimi de nazarǵa aldy. Qumar Aqsaqalov áleýmettik jelidegi facebook paraqshasynda kásiporynǵa qatysty pikirin bildirdi.

«ZIKSTO» zaýytynda eńbekaqy boıynsha qaryz vagon qurastyrý úshin qajet bólshekterdiń durys jetkizilmeýinen týyndady. Qazir balama joldaryn izdep jatyrmyz. Biz zaýyt jumysshylary quqyǵynyń buzylýyna jol bermeımiz. Jumys berýshi óz qyzmetkerleri aldyndaǵy barlyq mindetterin oryndaıtyn bolady. Zaýyt basshylyǵy jaqyn arada qaryzdy jabýǵa ýáde etti. Men ony óz baqylaýymda ustaımyn», - dep jazdy Qumar Aqsaqalov.

Sondaı-aq,bul suraq búgingi ákimdik otyrysynda da kóterilip, óńir basshysy máseleni óz baqylaýyna alatynyn aıtty.