Petropavldaǵy jylý júıesin jańǵyrtýǵa arnalǵan aýqymdy joba bıyl aıaqtalady
PETROPAVL. QazAqparat – Soltústik Qazaqstan oblysyn jylý jáne elektr energııasymen qamtyp otyrǵan kásiporyndar jóndeý jumystaryn josparǵa saı júrgizip jatyr. Úsh jylǵa shaqtalǵan aýqymdy joba bıyl aıaqtalady, dep habarlaıdy QazAqparat tilshisi.
SQO ákimi Qumar Aqsaqalov búgin óńirdiń qysqy jylytý maýsymyna ázirligin baıqaý maqsatynda, jóneý jumystary júrip jatqan nysandardy aralady.
Petropavldaǵy №2 Jylý elektr ortalyǵynyń 4 qazandyǵynda jóndeý jumystary 33% jáne 3 týrbınada 43% aıaqtaldy. Elektr jelileriniń 32%, ıaǵnı 536 shaqyrymy jáne jylý jelileriniń 50 % - 6,9 shaqyrymy aýystyryldy.
«Barlyq josparlaǵan jumystar kestege saı atqarylyp jatyr. Transformator stansalary, qazandyq agregattary aýystyryldy. Bıyl jylý magıstralin aýystyrýǵa qatysty 3 jylǵa shaqtalǵan jobany aıaqtaımyz. Bul oblys ortalyǵyn tıisti deńgeıde jylýmen qamtýǵa qajet. Qala úlkeıip keledi, kóp qabatty úıler salynyp jatyr. Jeke jer úıler súrilip, ornyna jańa nysandar turǵyzylyp jatyr. Qalany tıisti ınfraqurylymsyz damytý múmkin emes. Sol sebepti 3 jyl buryn biz osy jobany qolǵa alǵan edik», - deıdi óńir basshysy Qumar Aqsaqalov.
Qazirgi tańda oblystaǵy 148 qazandyqtyń 29% qysqy maýsymǵa daıyn. Bilim berýdiń 303 nysanynyń 49%, densaýlyq saqtaýǵa qarasty 281 nysannyń 52% qysqa ázirlendi.
