Petropavldaǵy jylý ortalyǵyn qalypqa keltirýge 18 mlrd teńge qajet
PETROPAVL. QazAqparat – Soltústik Qazaqstan oblysynyń qoǵamdyq keńesinde jaqynda apat bolǵan Petropavldaǵy jylý-elektr ortalyǵynyń máselesi qaraldy, dep habarlaıdy QazAqparat tilshisi.
Soltústik Qazaqstan oblysynyń Energetıka jáne turǵyn úı-kommýnaldyq sharýashylyǵy basqarmasynyń basshysy Baqyt Іlııasovtyń aıtýynsha, 1961 jyly salynǵan Petropavl jylý-elektr ortalyǵy búginde 60%-ǵa tozǵan. Al kásiporyndaǵy keıbir qazandyq agregattary 70-73 %-ǵa, týrboagregattar 78-82 %-ǵa eskirgen. Sondyqtan ortalyqtyń apatsyz jumys isteýi múmkin emes.
«2020-2021 jylǵy jylytý maýsymynda 13 tehnologııalyq olqylyq tirkelse, bıylǵy jylytý maýsymynda olardyń sany 39-ǵa jetti. Ol oblysty jylý jáne elektr qýatymen qamtý sapasyna áser etti.
20 naýryzda jylý-elektr ortalyǵyndaǵy № 1 tútin murjasy jartylaı opyrylyp qulady. Qazirgi ýaqytta tergeý organdary onyń qulaý sebepterin anyqtap jatyr. «SevKazEnergo» AQ ortalyqtyń jumysyn qalpyna keltirý úshin Jol kartasyn jasady. 15 sáýirden bastap opyrylǵan murjany buzý bastalady. Budan keıin tehnıkalyq nysan zerttelip, jańa murjany salý jobasy ázirlenedi», - deıdi Baqyt Іlııasov.
Bıylǵy jylytý maýsymynda jylý-elektr ortalyǵynda 5 ret apat bolyp, saldarynan 12 qazandyq agregatynyń tek 2-5-eýi ǵana jumys istegen kezderi boldy. Mamannyń aıtýynsha, turǵyndardy jylýmen tolyq qamtý úshin 9 qazandyq agregaty men 6 týrboagregat jumys isteýi qajet.
«Jylý-elektr ortalyǵyndaǵy qondyrǵylar eskirgen. Kásiporynǵa kezeń-kezeńmen jańǵyrtý júrgizý qajet. Qazir boljam boıynsha ortalyqty jónge keltirý úshin shamamen 17,9 mlrd teńge qajet», - deıdi basqarma basshysy.
Oblystyq qoǵamdyq keńes músheleri tozyǵy jetken jylý ortalyǵyn jóndeýdiń tıimdiligine shúbá keltirdi. Olardyń pikirinshe, jańa jylý-elektr ortalyǵyn salý máselesin kóterý qajet. Ázirge apat ornynda respýblıkalyq memlekettik komıssııa jumys istep jatyr.
