Petropavldaǵy jylý-elektr ortalyǵy murjasynyń qulaýyna qatty jel sebep bolýy múmkin
PETROPAVL. QazAqparat – Petropavldaǵy jylý-elektr ortalyǵyndaǵy apatqa baılanysty birden bes qazandyq sóndirildi, dep habarlaıdy QazAqparat tilshisi.
Soltústik Qazaqstan oblysy ákimi baspasóz qyzmetiniń málimetinshe, oqıǵa ornynda oblys ákiminiń orynbasary Sátjan Ablalıev pen tótenshe jaǵdaılar departamentiniń bastyǵy Ramıl Kamalov júr.
Ortalyqtaǵy №1 tútin murjasy jartylaı qulap túsken. Qalǵan ekeýi jumys istep tur.
TJD málimetinshe, tútin murjasynyń qulaýyna qatty jel sebep bolýy múmkin. Búgin kúndiz 112 qyzmeti óńirde sekýndyna 28 metrge deıin daýyl turatynyn eskertip sms habarlama jibergen edi.
Qazirgi ýaqytta oqıǵa ornynda TJD jedel toby, órt sóndirýshiler, qutqarýshylar, polıtseıler jáne jedel járdem jumys istep jatyr. Ázirge zardap shekkender týraly málimet joq.
Al, áleýmettik jelide turǵyndar páterleriniń salqyndap ketkenin aıtyp shaǵymdanýda.
«Ázirge biz tútin murjasynyń neden qulaǵanyn aıta almaımyz. Tergeý júrgiziletin bolady. Murja qazandyq tsehynyń mańynda qulaǵan. Saldarynan 1-5 qazandyq agregattary totatyldy. Qazirgi ýaqytta eki qazandyq agregaty ǵana jumys istep tur. Túnde taǵy tórteýin qosý josparlanǵan. Nátıjesinde 6 qazandyq agregaty jumys isteıtin bolady.
Jumysshylarǵa keler bolsaq, ázirge zardap shekkender anyqtalǵan joq. Túgendelip jatyr. Sondaı-aq úıindilermen jumys júrip jatyr. Aǵymdaǵy máselelerdi sheshý úshin jedel shtab quryldy», - deıdi «SevKazEnergo» AQ baspasóz hatshysy Lılııa Sherına.
