Petropavldaǵy JEO-nyń jartylaı qulaǵan tútin murjasyn buzyp alyp jatyr
«SevKazEnergo» AQ baspasóz qyzmetiniń málimetinshe, qazirgi ýaqytta alańda óskemendik «KazteploSPETsSTROI» JShS-niń 400-ge jýyq mamany jumys istep jatyr. Jumysshylar aldymen murjanyń syrtqy kirpish qabatyn buzyp almaq. Bul jumysty bir apta ishinde aıaqtaıdy. Sodan keıin ǵana jumysshylar mıneraldy plıtadan turǵyzylǵan jylý oqshaýlaǵyshyn bólshekteýge kirisedi. Osylaısha ústińgi eki qabatty jáne temirbeton murjasynyń ózin eki aı boıy 30 metrlik belgige deıin qolmen bólshektemek. Al qalǵan qurylymdy buzý 3 tamyzda aıaqtalady. Odan keıin qurylys qaldyqtaryn tıeý jáne tasymaldaý jumystary aıdyń sońyna deıin jalǵasady.
Mamandardyń pikirinshe, nysan eski, 60 jyl buryn salynǵan. Sondyqtan bólshekteýdiń eń qaýipsiz ádisi tańdalǵan, ıaǵnı tútin murjasyn 30 metrlik belgige deıin qolmen buzyp, sodan keıin tehnıka paıdalanylady.
«Jospar boıynsha eki aıdyń ishinde buzyp úlgerýimiz qajet. Qazir óskemendik 400 adam jumys istep jatyr. Jumys qyzǵan shaqta olardyń sany 750-ge deıin jetedi.
Sondaı-aq, qyrkúıekte jylý-elektr ortalyǵynyń №4, 5, 6, 7 qazandyq agregattarynan bastap, jalpy gaz qubyrynyń bir bóligin qaıta jańǵyrtý jumystary aıaqtalady. Osylaısha, jylytý maýsymynda stantsııa qalany jylýmen qamtamasyz etýge jetkilikti 9 qazandyq agregatyn iske qosady. Eki tútin murjasy jetkilikti. Bıyl qarasha aıynda №1 jáne 3 qazandyq agregattarynan eki qosymsha gaz qubyry daıyn bolady, nátıjesinde 9 qazandyq bir ýaqytta jumys isteıdi jáne 2-ýi rezervte bolady», - deıdi «Sevkazenergo» AQ baspasóz hatshysy Lılııa Sherına.
Búginde Petropavl jylý-elektr ortalyǵynda aýqymdy kúrdeli jóndeý jumystary júrgizilip jatyr.
Esterińizge sala ketsek, bıyl 20 naýryz kúni jylý ortalyǵynyń úsh tútin murjasynyń bireýi opyrylyp qulaǵan bolatyn.
Úıindiniń astynda qalǵan jumysshy qaıtys boldy.
Qylmystyq is qozǵalyp, ortalyq dırektory men bas ınjeneri qamaýǵa alyndy.