Petropavldaǵy JEO-ny jóndeýge 5 mlrd teńgeden astam ınvestıtsııa salynbaq

ASTANA. QazAqparat – Búgin Soltústik Qazaqstan oblysynyń turǵyndarymen kezdesý kezinde Energetıka mınıstri Almasadam Sátqalıev jylý elektr stantsııasynyń tozý deńgeıine qatysty pikir aıtty, dep habarlaıdy QazAqparat tilshisi.

«Óńirdegi eń negizgi jáne ózekti máselelerdiń biri – elektr energetıkasy salasy. Soltústik Qazaqstan oblysynda elektr jáne jylý energııasyn Petropavl jylý elektr ortalyǵy óndirip jatyr. Stantsııanyń elektr qýaty 512 MVt, jylý qýaty – 713 Gkal/saǵ. Bul rette, stantsııadaǵy negizgi jabdyqtardyń tozýy 56,1 paıyzǵa jetken», - dedi A. Sátqalıev.

Onyń aıtýynsha, 2022 jyly jóndeý jumystaryna ınvestıtsııa az bólinýine baılanysty Petropavl jylý elektr ortalyǵynda tehnologııalyq irkilis jaǵdaıy bir jarym esege, al 2019 jylmen salystyrǵanda úsh esege ósýi tirkeldi.

«Osyǵan deıin murjanyń joǵary jaǵy qulaǵan bolatyn. Mınıstrlik tehnıkalyq jaǵdaıyn baǵalaý júrgizý úshin Petropavl jylý elektr ortalyǵyna táýelsiz sarapshylar komıssııasyn jiberdi. Onyń qorytyndysy boıynsha Petropavl JEO–2-niń jumysyn qalypqa keltirý boıynsha jol kartasy ázirlendi. Osy máseleni sheshý maqsatynda 2022 jyly 6,3 mlrd teńge ınvestıtsııa bólindi. Al bıyl 5,6 mlrd teńge ınvestıtsııa tartý josparlanyp otyr», - dedi mınıstr.

Esterińizge sala keteıik, byltyr 20 naýryz kúni Petropavldaǵy JEO-da úsh tútin murjasynyń biri opyrylyp qulady.

Petropavldaǵy JEO-daǵy jaǵdaıǵa qatysty «OAEK» AQ Dırektorlar keńesiniń tóraǵasy da túsinikteme berdi.