Petropavldaǵy JEO murjasyn nelikten tek úsh adam ǵana bólshektep jatqany túsindirildi
PETROPAVL. QazAqparat – Petropavldaǵy 2-shi jylý-elektr ortalyǵynyń jartylaı qulaǵan tútin murjasyn nelikten tek úsh adam ǵana bólshektep jatqandyǵy týraly «Sevkazenergo» AQ túsinik berdi, dep habarlaıdy QazAqparat tilshisi.
Buǵan deıin áleýmettik jelide Petropavldaǵy jylý ortalyǵynyń ishinara qulaǵan tútin murjasyn buzýǵa úsh adamnyń ǵana jumyldyrylǵandyǵy jóninde aqparat tarady. Bul qala turǵyndarynyń narazylyǵyn týdyrdy. Petropavldyqtar mundaı qarqynmen ortalyq qysqy maýsymǵa daıyndalyp úlgermeıdi dep qaýiptenedi.
«Sevkazenergo» AQ baspasóz qyzmetiniń málimetinshe, úlken brıgadaǵa qaýipti aımaqta bolýǵa tyıym salynǵan. Óıtkeni alyp konstrýktsııa turaqsyz, qaıta qulaý qaýpi joǵary. Sondyqtan bıiktiktegi jumystardy arnaıy daıyndalǵan alpınıster atqaryp jatyr.
«Taǵy ekeýi tómennen jabdyqty baqylaıdy. Montajshylar toby tipti kúrdeli aýa-raıynda da jumys istemeıdi. Qatty jel men jańbyr olardyń ómirine qaýip tóndiredi. Murjany barlyq jaǵynan qorshap turatyn jyljymaly platforma ornatylady, bul jumys qazir aıaqtalýǵa jaqyn. Nátıjesinde ol murjany bólshekteý jyldamdyǵyn arttyrady. Mamandar betondy balǵamen syndyryp, aramen kesip ala alady, olar jumysty burynǵydaı murjanyń ústinde otyryp atqarmaıdy, turaqty platformanyń ústinde turyp isteıdi», - dep túsindirdi kompanııanyń baspasóz qyzmeti.
Aıta ketý kerek, buǵan deıin osy merdiger – «KZ TeploStroı-Servıs» JShS Úlbi metallýrgııa zaýytynyń murjasyn bólshektegen edi.
