Petropavldaǵy JEO-2 kúl tógý úshin 89 ga ormandy otamaqshy

PETROPAVL. QazAqparat – Petropavldaǵy №2 Jylý-elektr ortalyǵy kúl tógý úshin ormandy alqaptyń 89 ga paıdalanbaq. Biraq keıin kesilgen aǵashtyń ornyna 10 ese artyq kóshet otyrǵyzýdy mindetke almaq, dep habarlaıdy QazAqparat tilshisi.

«Sevkazenergo» AQ baspasóz qyzmetiniń málimetinshe, Petropavldaǵy №2 JEO-nyń kúl saqtaıtyn jalǵyz orny tolýǵa jaqyn. Ol 2027 jylǵa deıin ǵana shaqtalǵan. Sondyqtan stantsııanyń úzdiksiz jumys isteýi jáne qala men oblystyń tynys-tirshiligin qamtamasyz etý úshin jańa kúl úıindisin salý qajettiligi týyndap otyr.

Kompanııa ákimdik ókilderimen birge jańa kúl úıindisi úshin ártúrli jer ýchaskelerin qarady, biraq olardyń barlyǵy qurylysqa jaramsyz nemese birqatar sebep boıynsha aıtarlyqtaı qymbatqa soqpaq. Máselen, bir jerde topyraq jaramsyz bolsa, endi birinde jerasty sýlary deńgeıi joǵary, sondaı-aq óndiristik alańnan qashyq jatýy, ınjenerlik jelilerdiń bolmaýy da tıimsiz. Bul faktorlar qurylystyń smetalyq qunyn birneshe ese arttyrady. Al bul keıin tarıfterdiń ósýi arqyly turǵyndardyń qaltasyn qaǵýy múmkin.

Osyǵan baılanysty qazirgi № 2 kúl úıindisine irgeles aýmaqta jańadan kúl úıindisin salý múmkindigin qarastyrý týraly sheshim qabyldandy. Jer ýchaskesiniń jalpy aýdany 238 ga, alaıda bul ýchaskedegi 89 ga memlekettik orman qorynyń jeri ornalasqan.

«Sevkazenergo» kompanııasy bul máseleni sheshýge bolady degen pikirde, olar kesilgen aǵashtardyń ornyna on ese artyq kóshet otyrǵyzýdy usyndy. Osylaısha, orman qorynyń aýmaǵyn edáýir ulǵaıtýdy, ormandy tolyǵymen qalpyna keltirýdi mindettenedi.

Mamandardyń aıtýynsha, kúl tókken aýmaqtyń mańynda qazirdiń ózinde óńirde kezdesetin aǵashtardyń birqatary ósip jatyr. Mysaly № 2 kúl úıindisiniń aýmaǵynda shyrǵanaqtyń tutas alqaby bar, soltústik aımaqta keń taralǵan qaıyń, terek, úıeńki jáne basqa da aǵashtar ósedi.