Petropavldaǵy jekemenshik úıde gaz jaryldy
PETROPAVL. QazAqparat - Petropavldaǵy jekemenshik úılerdiń birinde gaz jaryldy, dep habarlaıdy QazAqparat tilshisi.
Soltústik Qazaqstan oblystyq tótenshe jaǵdaılar departamenti baspasóz qyzmetiniń aqparatyna súıensek, oqys oqıǵa Jumysshylar kentinde bolǵan. Oǵan turmystyq gaz ballonyn durys paıdalanbaý sebep bolǵan. Ýaqytsha salynǵan úıdiń qabyrǵalary men shatyry opyrylǵan, biraq artynsha órt tutanbaǵan.
Gaz jarylysy saldarynan eki qolyn, tabanyn, betiniń 3 paıyzyn 2-3 dárejeli kúıik shalǵan 55 jastaǵy er adam №3 qalalyq aýrýhananyń travmatologııa bólimine jetkizildi.
«Turǵyndarǵa úıleriniń, páterleriniń órt qaýipsizdigi jaǵdaıyn únemi qadaǵalap otyrýyn, ásirese peshterdiń, gaz qondyrǵylardyń, elektr symdary men elektr aspaptarynyń aqaýy bar-joǵyna asa mán berý qajettigin eskertemiz», - deıdi departament ókilderi.
Avtor: Olesıa Jýkoven
