Petropavldaǵy jańa ınfektsııalyq aýrýhana syrqattardy qabyldaı bastady

PETROPAVL. QazAqparat – Petropavlda paıdalanýǵa berilgen jańa modýldik ınfektsııalyq aýrýhana alǵashqy syrqattardy qabyldaı bastady, dep habarlaıdy QazAqparat tilshisi.

SQO Densaýlyq saqtaý basqarmasynyń málimetinshe, óńir aýrýhanalarynda koronavırýs ınfektsııasyn juqtyrǵandarǵa arnalǵan 950 oryn bar. Onyń 280-i karantındik statsıonarlarda ornalasqan. Búgingi kúni emdeý mekemelerinde COVID-19 juqtyrǵan 335 adam em alyp jatyr. ıAǵnı barlyq orynnyń 35% ǵana bos emes.

«Qazir oblysta koronavırýspen kúreske 1 myń medıtsına qyzmetkeri tartylǵan. Olar statsıonarlarda jumys istep, blokposttarda, sanıtarlyq beketterde, shekarada kezekshilik atqaryp jatyr. Syrqattanǵandar sany artqan jaǵdaıda mamandardyń qataryn ulǵaıtýǵa múmkindik bar», - deıdi SQO Densaýlyq saqtaý basqarmasy bastyǵynyń mindetin atqarýshy Nurlan Aımanov.

Em alyp jatqan 335 adamnyń 21-i jansaqtaý bóliminde jatsa, bireýiniń jaǵdaıy óte qıyn. Taǵy 11 syrqat ókpeni jasandy jeldetý apparatyna qosylǵan.

«Shilde aıymen salystyrǵanda materıaldyq-tehnıkalyq qamtylýymyz óte jaqsy. Sol kezde nebary 76 ókpeni jasandy jeldetý apparaty bolsa, búginde ony 160-qa jetkizdik. Aýrý asqynǵan jaǵdaıda keı medıtsınalyq qyzmetterdi qysqartyp, IVL apparattarynyń sanyn 212-ge deıin jetkize alamyz. Sol sekildi ottegi kontsentratorlary da jetkilikti deńgeıde alyndy. Syrqattardy emdeýde de tájirıbe jınadyq, búginde koronavırýspen aýyrǵandardy emdep jaza alamyz», - deıdi Nurlan Aımanov.

Petropavlda eki-úsh aıdyń ishinde jańadan salynǵan ınfektsııalyq aýrýhana búginnen bastap alǵashqy syrqattardy qabylaı bastady. 200 oryndyq modýldik aýrýhana zamanaýı qondyrǵylarmen jaraqtandyrylǵan. Bul jerde aýyr haldegi naýqastar emdelmek.

«Birer kúnde koronavırýspen aýyrǵandarǵa arnalǵan oryndardy 1,5 myńǵa jetkizýdi josparlap otyrmyz. Aı saıyn asa aýyr halde túsken 100-den astam adamdy aıaqqa turǵyzyp jiberip jatyrmyz. Jalpy bizge statsıonarlarǵa túsip jatqan syrqattardyń ár úshinshisi – maska taǵýdyń esh paıdasy joq dep esepteıdi. Bul durys emes, talaptardy bir kisideı oryndamaıynsha aýrý asqyna beredi», - deıdi SQO Densaýlyq saqtaý basqarmasy bastyǵynyń mindetin atqarýshy Nurlan Aımanov.

Buǵan deıin SQO-daǵy mektep oqýshylary arasynda KVI juqtyrýdyń 56 jaǵdaıy anyqtalǵanyn aıttyq.