Petropavldaǵy jaǵymsyz ıis máselesi sheshiletin boldy
PETROPAVL. QazAqparat – Petropavl turǵyndaryn birneshe jyldan beri mazalap kelgen jaǵymsyz ıis máselesi bir jyl ishinde sheshilmek. Ol úshin reseılikterdiń tájirıbesi qoldanylatyn boldy, dep habarlaıdy QazAqparat tilshisi.
Petropavldy kóktem-jaz bolsa jaǵymsyz ıis jaılap, turǵyndar tereze ashýdan qalady. Aýaǵa taraǵan kúkirtsýtektiń mólsheri keı kúnderi birneshe ese artyp, turǵyndardyń mazasy ketetin.
Kúlimsi ıis Petropavldyń mańyndaǵy bıotoǵannan tarap jatyr. Endi bul másele sheshimin tapqan syńaıly.
«Qyzyljar sý» JShS bas dırektory Jeńis Sultanov bul jaıynda áleýmettik jelidegi paraqshasynda málim etti.
«Bıyl kóktemde kúkirtsýteginiń ıisi qalada ótkir sezildi. Máseleni sheshý úshin osy kúnge deıin ǵylymı jáne kommertsııalyq mekemelerden kóptegen usynysty qaradyq. Óńdeý múmkindigin qarastyrý úshin bıotoǵannyń tunbasyn Máskeýge de jiberdik. Eldegi áriptesterimizdiń tájirıbesimen tanystyq. Barlyǵyn zerdeleı kele «Sýdyń ǵylymı-tehnologııalyq ortalyǵy» JShS kelisimge otyratyn bolyp sheshtik. Olar bıotoǵanǵa algolızatsııa júrgizetin bolady», - dep jazdy Jeńis Sultanov.
Sý qoımasyn algolızatsııalaý degen oǵan baldyrlardyń bir nemese birneshe túrin engizý. Bul tásil álem boıynsha qoldanylyp keledi. Ádette toǵandardy tazartýǵa hlorella qoldanylady.
«Bul joba elimizde alǵash ret qoldanylmaq. Bizdiń mamandar ony úshinshi jyl zerttep keledi. Sol úshin Reseıdiń Penza qalasyna baryp, jergilikti qus fabrıkasynyń jumysymen tanysty. Nátıjeleri jaman emes. Jaqynda kelisimge otyramyz. Jobany óz esebimizden qarjylandyramyz. Bul jumys eki jylǵa shaqtalǵan. Aldaǵy kóktemde Petropavldaǵy jaǵymsyz ıisten qutylamyz dep oılaımyn», - dedi óz jazbasynda Jeńis Sultanov.
