Petropavldaǵy zaýyt jumysshylaryna 86 mln teńge bereshek
PETROPAVL. QazAqparat – Petropavldaǵy aýyr mashına jasaý zaýyty jumysshylaryna 2 aıǵa jýyq eńbekaqy tólemegen. Kásiporynnyń bereshegi 86 mln teńgege jetti, dep habarlaıdy QazAqparat tilshisi.
«Petropavl aýyr mashına jasaý zaýyty» AQ baspasóz qyzmetiniń málimetinshe, áleýmettik aýdarym, medıtsınalyq saqtandyrý men zeınetaqy jarnasyn tóleý jáne jumystan shyqqan qyzmetkerlerdiń eńbekaqysyn qosqanda qaryz 86 mln teńgeni quraıdy. Bul – aqpannyń jáne naýryzdyń jarty aıynyń bereshegi.
«Kásiporyn iri tenderdi utyp alyp, sol boıynsha jumys isteýi kerek edi. Tehnıkalyq jaǵdaılarǵa baılanysty ol qaıta-qaıta keıinge qaldyryldy. 14 sáýir kúni tender oınatyldy. Biz tıisti qujattarǵa qol qoıyp, endi qarajattyń túsýin kútip otyrmyz. Alatyn soma – 500 mln teńgeden asady. ıAǵnı, sáýir aıynyń sońyna deıin eńbekaqy boıynsha qaryz jabylady. Al sáýir aıynyń eńbekaqysyn jumysshylar zań boıynsha 10 mamyrǵa deıin alady», - deıdi «PAMJZ» AQ baspasóz hatshysy Elena Stadnık.
Zaýyt ókiliniń aıtýynsha, qazir kásiporynda 700-ge jýyq adam jumys isteıdi. Jumysshylardyń bir aılyq eńbekaqy kólemi shamamen 65-70 mln teńge.
«2020 jyldan bastap jaǵdaıymyz kúrdeli. Pandemııa bastalǵaly munaı óndirýshi kompanııalar óndiristi azaıtty, saldarynan bizdiń ónimge suranys kemidi. Budan basqa shekaralardyń jabylýyna baılanysty shetelden materıal kirgizý qıyndyq týdyrdy. Biz barlyq metalldy Reseıden jetkizemiz, óıtkeni elimizde óz óndirisimiz joq. Keı qosalqy bólshekter keden beketinde 2-3 aılap turyp qaldy. Bul da óndiriske áser etti. Ol kezde de eki aı boıynsha eńbekaqy qaryzy boldy. Biraq máseleni ýshyqtyrmaı sheshe aldyq», - deıdi Elena Stadnık.
Qazirgi tańda «PAMJZ» AQ Qazaqstannyń munaı óndirýshi kompanııalaryna qajet qondyrǵylar shyǵarady. Budan basqa munaı óńdeý kásiporyndaryna qajet qondyrǵylardy, servıstik qyzmet kórsetetin arnaıy tehnıkany jáne temirjoldy jóndeýge kerek qondyrǵylardy jasaıdy.
«2019 jyly TMD elderi ishinde birinshi bolyp bizdiń zaýyt termos vagondardy qurastyra bastady. Biz óndiristi tolyq jolǵa qoıdyq, sáıkestik sertıfıkatyn aldyq. Qazirgi ýaqytta konstrýktorlyq qujattardyń ıesi - «Cool Infinity» JShS, olar bul isti damytyp jatyr, biz vagondarǵa qajetti bólshekterdi shyǵaramyz.
Kásiporyn birneshe ret jańǵyrtyldy. Sońǵy ret respýblıkalyq bıýdjetten 4,4 mlrd teńge bólinip, 2018-2020 jyldar aralyǵynda 39 zamanaýı qondyrǵy jetkizildi. Taǵy da pandemııanyń saldarynan Germanııadan maman kele almaı jatqandyqtan, olardy iske qosý kesheýildep jatyr. Biraq munyń bári – ýaqytsha qıyndyqtar», - deıdi baspasóz hatshysy.
SQO memlekettik eńbek ınspektsııasy basqarmasy bul jaǵdaıǵa qanyq.
«Jyl basynda eńbek ınspektsııasy basqarmasy zaýytta profılaktıkalyq baqylaý júrgizdi, biraq qańtar aıynda eńbekaqy boıynsha qaryz anyqtalǵan joq. Keıin jumysshylardyń eńbekaqy ala almaı júrgendigi jaıynda aqparat keı BAQ-ta jarııalandy. Biraq zaýyt jumysshylary bizge aryzdanǵan joq. Sol sebepti teksere de almaımyz. Biraq jaǵdaı bizge tanys. Sol sebepti naýryz aıynda eńbek daýlaryn monıtorıngileý jumys tobynyń otyrysynda bul másele qaraldy. 13 sáýirde oblys ákimi tóraǵalyq etken úsh jaqty komıssııaǵa «PAMJZ» AQ bas dırektory shaqyrylyp, ol jaǵdaıǵa túsinikteme berdi. Aıtýynsha, jumysshylarǵa aqpan aıyna tolyq jáne naýryz aıynyń jartysyna eńbekaqy boıynsha bereshek bar», - deıdi SQO memlekettik eńbek ınspektsııasy basqarmasy basshysynyń orynbasary Mıras Sabaǵanov.
Qazir eńbek ınspektorlary jaǵdaıdy baqylaýda ustap, kúndelikti monıtorıng jasap otyr.
«Sońǵy málimet boıynsha, tender ótti, mamyr aıyna deıin qaryz óteledi. Eger de ýáde oryndalmasa, zaýyt jumysshylary bizge ótinish berýge quqyly. Sony negizge ala otyra jumys berýshige qatysty tekseristi bastaımyz. Uıǵarym beremiz. Aıyppul salamyz. Jumysshylardyń eńbekaqysy sot oryndaýshylardyń kómegimen zańdy túrde óndirilip alynady», - deıdi Mıras Sabaǵanov.
