Petropavldaǵy sý tasqynynyń ekinshi tolqyny birinshiden de joǵary
PETROPAVL. QazAqparat - Petropavl sý qoımasy sońǵy 23 jylda bolmaǵan deńgeıge kóterildi, dep habarlaıdy «QazAqparat» HAA tilshisi.
Oblys ákiminiń orynbasary Anton Fedıaev keıbir eldi mekenderde sý deńgeıi tómendese de, Petropavl aýdanynda kerisinshe kóterilip otyrǵandyǵyn aıtty.
«Esil ózenindegi Toqsan gıdrobeketi men Pokrovka aýylyndaǵy Sergeev sý qoımasynyń sý deńgeıi aıtarlyqtaı tómendeýi baıqalyp otyr. Petropavl sý qoımasy sýynyń úshinshi ret kóterilýi bolmaıdy dep boljaýdamyz. Ókinishke oraı, sońǵy kúni sýdyń deńgeıi taǵy da 6% artty. Qazgıdromettiń boljamy boıynsha búgin jáne erteń de sý kóterilýi múmkin. Taǵy da 10-13 sm bolady dep kútilýde. Petropavl qalasy boıynsha sý deńgeıi eń joǵary shegine jetip, sosyn sýdyń deńgeıi birtindep tómendeıtin bolady,- dedi Anton Fadıaev.
«Birinshi sý tasqyny oryn alǵan kezde Petropavl sý qoımasyndaǵy sýdyń deńgeıi 11,67 metr bolǵan edi, al qazir ol - 11,87 metr deńgeıdi kórsetip otyr. Buǵan deıin oblysta sýdyń eń joǵary deńgeıi 1994 jyly tirkelip, 11,26 metrdi quraǵan»,- dedi ákimniń orynbasary.
Búginde Mıchýrıno bógeti qaıta bekitildi, jaǵdaı turaqtaldy, alaıda sý deńgeıiniń joǵary bolýyna baılanysty bóget jumysyn baqylaý jalǵasýda. Jalpy jaǵdaıdy qatty soqqan jel qıyndatyp otyr.
Oblysta sý alǵan barlyq 224 úıge sońǵy táýlikte Dolmatov eldi mekeninen taǵy da úsh úı qosyldy. Sondaı-aq sý astynda Bylǵary zaýyty kentindegi 115 turǵyn úı jáne Zarechnyı kentindegi 30 úı qalyp otyr.
Óz kezeginde oblys ákiminiń orynbasary, qazirgi kezde bylǵary zaýyty kentindegi bóget qurylysyna arnalǵan jobalyq-smetalyq qujat ázirlenýde ekendigin tilge tıek etti. Qurylystyń jalpy quny shamamen 2,5 mlrd teńgege eseptelgen.
