Petropavldaǵy sý tasqyny saldarynan zardap shekkenderge ótemaqy tólendi
PETROPAVL.QazAqparat - Sý tasqynynan zardap shekken Zarechnyı jáne Teri zaýyty kentiniń turǵyndaryna ótemaqy tólene bastady, dep habarlaıdy «QazAqparat» HAA tilshisi.
Soltústik Qazaqstan oblysy ákiminiń orynbasary Asqar Saqypkereevtiń málimdeýinshe, 100 otbasy 32 mln teńge aldy.
Baǵalaý komıssııasy qalanyń sý basqan aýmaqtarynda jumystaryn jalǵastyryp jatyr.
«Qyzyljar aýdanynda ótemaqy tóleý bastaldy. 14 úıge tólendi, jalpy qajettilik 67 mıllıondy quraıdy. Rýzaev kentinde qıyndyq joq. Onda turǵyndar alǵylary kelgen baspanalaryn aldy. 8 úı satyp alyndy, eki otbasy bas tartty, olarǵa aqsha tólendi», - deıdi Asqar Saqypkereev.
Soltústik Qazaqstan oblysynyń ákimi Qumar Aqsaqalov bir apta ishinde qajetti jumystardyń bárin aıaqtap, zardap shekkenderge tólenetin qarajatty tólep, tasqyn saldarynan qıratylǵan jerlerge belsendi jumys júrgizilýin tapsyrdy.
«Men keshe sý basqan aýdandarda bolyp qaıttym. Turǵyndardyń aýlalarynda sý áli de bar. Maýsym aıy da kelip qaldy. Jetkizilgen sazsorǵy tehnıkalaryn paıdalana otyryp, Zarechnyı jáne Teri zaýyty aýmaqtaryndaǵy sýlardyń barlyǵy tazartylsyn. «Nur Otan» partııasymen birlese otyryp, jaǵdaı tolyq ońalǵanǵa deıin, turǵyndarǵa kómek kórsetilsin», - dedi Qumar Aqsaqalov.
Sý basqan kent turǵyndary óz úılerine oralady. Túrli uıym qyzmetkerleri men erikti petropavldyqtar olardyń aýlalaryn retke keltirýine kómektesedi. Turǵyndar jaz aılarynda úıleriniń keýip úlgermeıtindigine alańdaýly. Keıbir úılerde sý bir aıǵa jýyq turǵan.
Jaǵdaı óńirdegi jaýyn-shashyn saldarynan kúrdelenip otyr. Búgin TJ departementi 30 mamyrǵa jaýyn-shashyndy aýa raıyn eskertti. Oblysta jaýyn-shashyn bolady, burshaq jaýýy múmkin.
