Petropavldaǵy sý qoımasy 90 paıyzǵa tolǵan
PETROPAVL. QazAqparat - Petropavl ákiminiń orynbasary Qaırolla Ǵaleev qalanyń sý tasqynyna qanshalyqty daıyn ekendigin aıtty, dep habarlaıdy QazAqparat tilshisi.
Onyń sózine qaraǵanda, qys mezgilinde Petropavl kóshelerinen 110 myń tekshe metr qar shyǵarylǵan. Qaladaǵy nóserge arnalǵan kárizdik júıeniń uzyndyǵy 92 shaqyrym. Onyń 44-i - ashyq bolsa, 48-i - jabyq. Qazir olardyń sáıkesinshe 90%-y men 70%-y tazartyldy.
«Kóshelerden 25 myń tekshe metr sý shyǵaryldy. Bıyl úılerde sý joq. Sý basý men nóser sýyn tazalaý boıynsha dıspetcherlik qyzmetke túsken ótinishter sany 100-den 40-qa azaıdy. Qalada quramynda 36 adam men 30 tehnıkasy bar 6 brıgada jumys isteıdi», - dedi Q.Ǵaleev.
Petropavldaǵy sý qoımasy qazir 88,9 paıyzǵa tolǵan. Q.Ǵaleevtiń aıtýynsha, sý 1 santımetrge kóterilgen. Sergeev sý qoımasy 92,7 paıyzǵa tolǵan. Munda sýdyń deńgeıi sý tasqyny kezeńinen bastap 16 santımetrdi quraǵan.
Petropavlda sý tasqyny is-sharalaryn júrgizýge 7,3 mıllıon teńge bólingen.
Foto: news.rambler.ru
