Petropavldaǵy «Shyǵys» yqsham aýdanynda 9 qabatty 27 úı salynady

Petropavl qalalyq ákimdik, «Turǵyn úı qurylys jınaq banki» AQ Soltústik Qazaqstan oblystyq fılıalynyń jáne kókshetaýlyq «Regıon Stroı» JShS áriptestik jónindegi memorandýmǵa qoı qoıdy. Qurylys kompanııasy kún jylynysymen-aq Petropavldaǵy «Shyǵys» yqsham aýdanynda turǵyn úı qurylysyn bastamaqshy.

Turǵyndardy qoljetimdi baspanamen qamtý maqsatynda 9 qabatty 27 úı bes jyl boıy turǵyzylady. Qurylys kompanııasy alǵashqy baspanany 2020 jyldyń kókteminde paıdalanýǵa bermekshi.

«Turǵyn úıler jańa tehnologııa boıynsha panelden turǵyzylady. Biraq ony ertedegi osyndaı ádispen salynǵan úılermen salystyrǵan durys emes. Fın tehnologııasy, energııalyq tıimdiligi asa joǵary. Biz buǵan deıin mundaı baspanalardy Kókshetaýda, Oral men Qaraǵandyda salyp, paıdalanýǵa berdik. Qysta jyly, jazda qapyryq bolmaıdy», - deıdi qurylys kompanııasy dırektorynyń orynbasary Qanat Luqpanov.

Páterler turǵyndarǵa qoljetimdi bolmaq.

Bank qyzmetkerleriniń aıtýynsha, sharshy metriniń baǵasy 150-180 myń teńge aralyǵynda saqtalady. Bir bólmeli páterdiń aýdany 40 sharshy metr bolsa, 2 bólmeli - 60 jáne 3 bólmeli - 84 sharshy metrge deıin jetpek. Bir aıta keterligi, tek bank salymshylary ǵana bul úılerden úmittene alady.

Búginde «Turǵyn úı qurylys jınaq bankiniń» oblysta 41 myń salymshysy bar. Olardyń depozıtterinde shamamen 16,7 mlrd teńge saqtaýly.

«27 úı josparlanǵan, 9 qabatty. 3200-den astam páter bolady. Baǵasyn, páterlerdiń ornalasý retin jáne basqa da aqparatty fılıalǵa kelip bilýge bolady. Shaǵyn yqsham aýdanda budan basqa barlyq qajetti áleýmettik nysandar: mektep, balabaqsha, dúkender de salynady», - deıdi ««Turǵyn úı qurylys jınaq banki» AQ Soltústik Qazaqstan oblystyq fılıalynyń bıznesti damytý bóliminiń basshysy Ámir Nurmuqanov.

Budan basqa «Turǵyn úı qurylys jınaq banki» arqyly SQO-da «Nurly jer» baǵdarlamasy boıynsha bıyl 4 úı salynyp, 424 páter qoldanýǵa berilmekshi. Bul - byltyrǵydan shamamen eki ese kóp.