Petropavldaǵy separatızm isi: Kúdiktilerdiń basqa óńirlerdegi jaqtastaryn anyqtaý jumysy júrgizilýde
«2023 jylǵy 30 naýryzda Soltústik Qazaqstan oblysynyń birqatar turǵynynyń áleýmettik jelilerde «Halyq keńesin» qurý bastamasyn jarııalaý faktisine qatysty Ulttyq qaýipsizdik komıteti Qazaqstan Respýblıkasy Qylmystyq kodeksiniń 180-baby, 2-tarmaǵy boıynsha (buqaralyq aqparat quraldarymen nemese telekommýnıkatsııalyq jelilerdi paıdalana otyryp jasaǵan separatıstik áreket) Petropavl qalasynyń birneshe turǵynyna qatysty tergeý is-sharalaryn júrgizýde. Komıssııalyq psıhologııa saraptamasynyń qorytyndylaryna sáıkes qatysýshylardyń is-áreketterinde separatızm belgileri anyqtalyp, qamaýǵa alyndy. Qazirgi tańda basqa óńirlerde olardyń jaqtastaryn anyqtaý boıynsha jumystar júrgizilýde», - dep atap ótedi vıtse-premer jaýabynda.
Onyń atap ótýinshe, osyndaı keleńsiz jaǵdaılar boıynsha ortalyq jáne jergilikti atqarýshy organdar tarapynan zań talaptaryn buzýshylarǵa qatysty qatań den qoıý is-sharalary men algorıtmder pysyqtalǵan. Qoǵamdyq-saıası jáne áleýmettik-ekonomıkalyq salalardaǵy daǵdarystyq jaǵdaılar týyndaǵan kezde memlekettik organdardyń jedel habarlandyrý jáne aqparattyq áreket etý algorıtmi jumys isteıdi.
«Budan basqa, óńirlik ádilet organdary halyqtyń quqyqtyq saýattylyǵyn jetildirý úshin quqyqtyq mádenıet pen quqyqtyq normalary boıynsha túsindirý jumystaryn belsendi júzege asyrýda. Osy rette, quqyqtyq nasıhat boıynsha buqaralyq aqparat quraldaryn, ınternet-portaldardy, áleýmettik jelilerdi qamtıtyn birqatar is-shara (tikeleı efırler, kirispeler, suhbattar) ótkizilýde. Úkimet azamattardyń, ásirese jastardyń arasynda patrıotızm, memlekettik múdde qundylyqtaryn nasıhattaý, aqparattyq túsindirýdi arttyrý boıynsha keshendi jumystar júrgizýde», - dep atap ótedi Altaı Kólginov.
Buǵan deıin separatızm babymen tergelip jatqan Petropavl qalasynyń úsh turǵynynyń málimdemesinde «Qazaqstannyń aýmaqtyq tutastyǵyn buzýdy nasıhattaý» belgileri bar ekeni anyqtalǵanyn jazǵan edik.
