Petropavldaǵy saýda úıiniń órtenýi: Terek mamyǵyna ot qoıǵandar izdestirilip jatyr
PETROPAVL. QazAqparat – Petropavlda «Severnyı» saýda úıiniń qoımasynan órt shyǵyp, 17 adam qaýipsiz jerge shyǵaryldy, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, N.Nazarbaev kóshesindegi 203-úıde ornalasqan «Severnyı» sýpermarketinde órt shyqqandyǵy jóninde habar keshe túnde saǵat 23.29 túsken. Saýda úıi bes qabatty turǵyn úıdiń birinshi qabatynda ornalasqan. Sol sebepti oqıǵa ornyna birden eki órt sóndirý bólimshesiniń mamandary jumyldyryldy.
«Órt saýda úıiniń qoımasynan shyǵyp, 10 sharshy metrdi sharpydy. Túngi saǵat 23.48 jalyn tolyǵymen óshirildi. Qoımadaǵy karton qoraptar janyp ketti, elektr symdary zaqymdaldy. Qoımanyń ústinde páterler ornalasqan. Onda turatyn 17 adam, sonyń ishinde 5 bala dalaǵa, qaýipsiz jerge shyǵaryldy. Bizdiń boljam boıynsha, bireýler sol mańdaǵy terektiń mamyǵyna ot qoıǵan. Órt sodan shyǵýy múmkin», - deıdi TJD bastyǵynyń orynbasary Nurlan Atyǵaev.
Qazir terektiń mamyǵyn órtegender izdestirilip jatyr.
Oqys oqıǵadana eshkim zardap shekpegen. Qazir órttiń shyǵý sebebi jáne kelgen shyǵyn mólsheri anyqtalyp jatyr.
