Petropavldaǵy órt: Egde jastaǵy er adam mert boldy, al 11 jasar qyz qutqaryldy
PETROPAVL. QazAqparat – Petropavlda jumystarymen júrgen qalalyq ákimdiktiń eki qyzmetkeri úıdiń janyp jatqanyn kórip, ishinen 11 jasar qyzdy shyǵardy, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń habarlaýynsha, oqıǵa 14 mamyr kúni bolǵan. Petropavl qalalyq ákimdiginiń zań bóliminiń jetekshisi Natalıa Derova men turǵyn úı –kommýnaldyq sharýashylyǵy bólimi basshysynyń mindetin atqarýshy Dosulan Bosynov Bereke yqsham aýdanynda kólikpen ótip bara jatyp bir úıden jalyndy baıqap qalady.
«Men birinshi elektr jelisi qysqa tuıyqtalǵan shyǵar, úı ıelerin eskertý kerek dep qasymdaǵy Natalıaǵa aıttym. Ol buryn órt sóndirý qyzmetinde jumys istegen. «Janyp jatyr» dedi. Biz kelgende úıdiń shatyry lapyldap janyp jatty. Kórshiler de jetip, úıde bala bolýy múmkindigin aıtty», - deıdi Dosulan Bosynov.
Birden «101» nómirine habar bergen olar bıik qorshaýdyń esigin buzyp kirip, úıge júgiredi.
«Úsh qabatty tereze áınegin syndyrýǵa jumsaǵan birneshe sekýnd bizge saǵattar ótkendeı kórindi. Terezeden eseńgiregen qyzdy kórdik. Shaqyryp edik, ol úıde atasy barlyǵyn, ony qutqarý qajettigin aıtyp aıǵaılaı berdi. Dosulan tútinge tolǵan úıge kirmekshi boldy, jibermedim. Óıtkeni qaıtyp shyqpas edi. Ekeýimiz eki jaqtan qyzdy kóndirip, terezeden kóterip aldyq. Atasynyń janyp jatqan verandaǵa kirip, qaıta shyqpaǵanyn kórgen qyzdy ázer jubattyq. Keshikpeı órt sóndirýshiler de keldi», - deıdi Natalıa Derova.
Natalıa órt sóndirýshilerdiń otbasynan shyqqan. Ákesi birneshe jyl osy salada eńbek etti. Natalıa da kezinde órt sóndirý qyzmetinde eńbek etse, qazir qyzy Irına olardyń jolyn jalǵastyryp jatyr.
Al Dosulan 13 jyl buryn Shymkentten qonys aýdaryp, jergilikti joǵary oqý ornyn bitirdi. Іshki ister organdarynda eńbek etti.
Órt sóndirýshiler jalyndy jarty saǵattyń ishinde aýyzdyqtady. Úıden gaz balondy alyp shyǵyp úlgerdi. Al úı ıesi 63 jastaǵy er adam mert boldy.
Aldyn ala boljam boıynsha, órt temeki tuqylynan shyǵýy múmkin.
