Petropavldaǵy «Nur» meshitinen órt shyqty
PETROPAVL. QazAqparat – Petropavldaǵy «Nur» meshitinde órt shyqty. Zardap shekkender, qaza tapqandar joq, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, búgin tańǵy saǵat 7.40 mınýt ketkende «101» jedel arnasyna Petropavldaǵy Jabaev kóshesi, 160 meken jaıda ornalasqan «Nur» meshitinde órt shyqqany jóninde habarlama túsedi.
Oqıǵa ornyna № 1 jáne № 2 mamandandyrylǵan órt sóndirý bólimderiniń, oblys ortalyǵynyń № 3 órt sóndirý bóliminiń jáne SQO TJD jedel-qutqarý jasaǵynyń bólimsheleri jiberildi.
Órt meshit ashanasyna irgeles aǵashtan salynǵan sharýashylyq nysanynda shyqqan eken. Ǵımarat otqa oranyp úlgeripti.
Jalyn meshit pen avtokólikterdi sharpymaýy úshin mamandarǵa jedel qımyldaýǵa týra keldi.
Nátıjesinde ashana men ǵıbadat ǵımaraty órtten aman qaldy. Oqıǵa ornynan jeti 50 lıtrlik gaz ballony shyǵaryldy.
Saǵat 8.11 mınýt ketkende órt tolyq sóndirildi.
Qaza bolǵandar men zardap shekkender joq.
Órt saldarynan 2 jeńil avtokólik ishinara zaqymdandy, sharýashylyq qurylysy janyp ketti.
Mamandardyń aıtýynsha, órttiń shyǵýyna elektr jelileriniń qysqa tuıyqtalýy sebep bolǵan.
