Petropavldaǵy murjasy qıraǵan jylý ortalyǵynyń qysqa daıyndyǵy qandaı

PETROPAVL. QazAqparat – Petropavlda QR Energetıka mınıstrliginen komıssııa kelip, jylý elektr ortalyǵynyń qysqa daıyndyǵyn kórdi. Óńirde 20 qyrkúıek jylytý maýsymy bastalmaq, dep habarlaıdy QazAqparat tilshisi.

«SEVKAZENERGO» AQ baspasóz qyzmetiniń málimetinshe, demalys kúnderi Petropavlǵa QR Energetıka vıtse-mınıstri Jandos Nurmaǵanbetov jáne Atomdyq jáne energetıkalyq qadaǵalaý men baqylaý komıtetiniń tóraǵasy Suńǵat Esimhanov kelip, kúrdeli jóndeý jumystary júrgizilip jatqan 2 jylý elektr ortalyǵynda boldy.

Mańyzdy nysannyń jylytý maýsymyna ázirligin jáne jylý ortalyǵyn qalpyna keltirý boıynsha jol kartasyn júzege asyrý jumystaryn kórdi.

Jospar boıynsha, sýyq túskenge deıin 12 qazandyqtyń 11-i jáne 2 tútin murjasy daıyn bolmaq. Qazirgi ýaqytta birinshi kezekte № 1, № 3-№ 7, № 12 qazandyq agregattaryn ekinshi tútin murjasyna qosý jumystary atqarylyp jatyr.

«Jylý-elektr ortalyǵynda qalpyna keltirý jumystary táýlik boıy atqarylyp jatyr. Josparlaǵanymyzdyń barlyǵy kestege saı kele jatyr. -25 gradýsqa deıin aıazda 9 qazandyq jumys istese jetkilikti, al ekeýi rezervte bolady. Eger aýa raıy – 25 gradýs synap baǵanasynan tómendese 10 qazandyq iske qosylyp, bireýi rezervte bolady», - deıdi «SEVKAZENERGO» AQ bas dırektory Oleg Perfılov.

Kúrdeli jóndeý jumystarymen qatar nysanda kóktemde jartylaı opyrylyp qulaǵan birinshi tútin murjasyn buzý jumystary da jalǵasqan. Mamandardyń aıtýynsha, qazirgi ýaqytta qurylymnyń 52 metri qaldy. Ol 30-ǵa jetkende qolmen bólshekteý toqtatylyp, iske tehnıka tartylady. Nátıjesinde murjany eki aptada tolyq buzý múmkin bolmaq.

Al JEO ekinshi jáne úshinshi tútin murjalaryn eksperttik uıymdar tolyq zerttep shyqty. Mamandardyń barlyq usynymdary oryndalyp, olqylyqtar joıyldy.

Petropavl qalasy ákimdiginiń málimetinshe, SQO-da 20 qyrkúıekte jylytý maýsymy bastalmaq.