Petropavldaǵy meıramhanada órt boldy
PETROPAVL. QazAqparat - Petropavldaǵy «Beer Grad» meıramhanasynda órt boldy, dep habarlaıdy «QazAqparat» HAA.
«6 jeltoqsan kúni saǵat 17-27-de órtke qarsy qyzmet kezekshiligine Petropavldaǵy «Evrazıskıı» ortalyq bazarynyń aýmaǵyndaǵy «Beer Grad» ataýymen belgili 5 qabatty meıramhanadan órt shyqqany týraly habar tústi. Ǵımarattyń mansardy retinde salynǵan bóligindegi shatyrdyń 170 sharshy metri órtengen. Órt sóndirýshiler 32 adam men osy ǵımarattyń 11 qyzmetkerin evakýatsııalady»,-delingen habarlamada.
Órt saǵat 18-06-da aýyzdyqtalyp, saǵat 20-21-de tolyq sóndirildi. Zardap shekkender men mert bolǵandar joq.
Órtti sóndirýge Soltústik Qazaqstan oblystyq Tótenshe jaǵdaılar departamentiniń jeke quramynan 56 adam men 15 tehnıka jumyldyrylǵan.
