Petropavldaǵy memlekettik ýnıversıtet 80 jyldyǵyn atap ótti
ASTANA. QazAqparat - Petropavlda Manash Qozybaev atyndaǵy SQMÝ 80-jyldyǵyna arnalǵan saltanatty shara ótti. Jıynǵa QR Bilim jáne ǵylym mınıstri Erlan Saǵadıev pen oblys ákimi Qumar Aqsaqalov qatysty, dep habarlaıdy ákimniń baspasóz qyzmeti.
Saltanatty jınalys barysynda SQMÝ rektory Serik Ómirbaev pen Bilim jáne ǵylym mınıstri Erlan Saǵadıev sóz sóılep, joǵarǵy oqý ornynyń ujymyn, stýdentterdi jáne túlekterdi mereıtoımen quttyqtady. Erlan Saǵadıev 3 soltústikqazaqstandyqqa «Eńbek ardageri» medalin tabys etti. 2 professor Ybyraı Altynsarın atyndaǵy tósbelgisimen, 2 qyzmetker "Qazaqstan Respýblıkasynyń ǵylymynyń damytýǵa sińirgen eńbegi úshin" tósbelgisimen, 6 oqytýshy «Qazaqstan Respýblıkasynyń Bilim berý isiniń qurmetti qyzmetkeri» tósbelgisimen marapattaldy.
Ýnıversıtet ujymyn mereıtoımen oblys ákimi Qumar Aqsaqalov ta quttyqtady.
«Joǵary oqý orny qurylǵan kúnnen bastap elimizdiń tarıhı damýymen birge qaınasyp, aldyna qoıǵan mindetterdi abyroımen atqaryp kele jatyr. Ásirese, elimiz táýelsizdik alǵannan keıingi ýaqytta ýnıversıtet damýynda jańa ózgerister oryn alyp, Bolon protsesine, Ýnıversıtetterdiń uly hartııasyna qosylý arqyly álemdik bilim keńistiginiń ıntegratsııalaný protsesine bet túzedi», -dep atap ótti óńir basshysy.
Uzaq jylǵy, adal eńbegi, ǵylym men bilim salasyndaǵy joǵary bilikti mamandardy daıarlaýǵa qosqan zor úlesi úshin oblys ákiminiń qurmet gramotasy jáne alǵys hatymen 6 ýnıversıtet qyzmetkeri marapattaldy.
Saltanatty sharada Qumar Aqsaqalov Ál-Farabı atyndaǵy QazUÝ rektory Ǵalymqaıyr Mutanovqa «Soltústik Qazaqstan oblysynyń qurmetti azamaty» ataǵyn berdi.
Jıynda SQMÝ «Ahmet Baıtursynov atyndaǵy ordenimen» marapattaldy. Ahmet Baıtursynov atyndaǵy «Altyn medali» , «Kúmis medali» jáne «Qola medaline» birsypyra ýnıversıtet oqytýshylary ıe boldy.
Bilim jáne ǵylym salasyna qosqan úlesi úshin Qazaqstan Respýblıkasy Joǵary mektebiniń Ulttyq ǵylym akademııasynyń medali de óz ıelerin tapty.
Saltanatty jıynda Manash Qozybaevtyń jubaıy Sara Qozybaeva da sóz sóılep, stýdentterge stıpendııalardy tabys etti.
Ýnıversıtettiń 60 shaqty stýdenti mereıtoıǵa arnap fleshmob uıymdastyrdy.
