Petropavldaǵy qoımalardyń birinen 13 tonna 105 lıtr spırt tárkilendi
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavlda reıd barysynda polıtsııa qyzmetkerleri Ekonomıkalyq tergeý departamentiniń mamandarymen birge úlken mólsherde spırt saqtalǵan qoımany anyqtady. Ǵımaratta bir tekshe metrlik bóshkelerge quıylǵan 13 tonna jáne 5 lıtrlik ydystarǵa quıylǵan 105 lıtr spırt bolǵan. Ruqsaty joq ónim tolyq tárkilendi. Materıal ári qaraı sheshim qabyldanýy úshin ekonomıkalyq tergeý departamentine jiberildi.
Jalpy jyl basynan beri Petropavlda zańsyz aınalymnan 18 tonnadan astam lıtsenzııasy joq spırttik ónim alyndy.
«Qylmystyń basym bóligi alkogoldik mas kúıde jasalady. Sondyqtan alkogol ónimi aınalymyna qatysty zańnamany saqtaý - polıtsııa jumysynyń bir baǵyty. Ýchaskelik ınspektorlar turaqty túrde reıdtik is-shara ótkizedi, turǵyndardan kelip túsken qońyraýlardy tekseredi. Quramynda spırt bar ónimderdi aktsızsiz ótkizý faktileriniń jolyn kesýge erekshe kóńil bólingen. Óıtkeni onyń sapasyna eshkim kepildik bermeıdi, adamdardyń densaýlyǵyna qaýip tóndirýi múmkin», - deıdi Petropavl qalalyq PB JPQ bóliminiń bastyǵy Rýstam Sadýlov.
Petropavldaǵy dúkenderdiń birinde 21 jasqa tolmaǵan turǵynǵa alkogol satý faktisi anyqtaldy. Polıtseıler QR Ákimshilik quqyq buzýshylyq kodeksiniń 200-baby 1-bóligi boıynsha materıal jınady. Sottyń sheshimimen dúken ıesine 122 myń 520 teńge mólsherinde aıyppul salyndy jáne spırttik ishimdikterdi satý lıtsenzııasynyń kúshi 1 aıǵa toqtatyldy.
«21 jasqa tolmaǵandarǵa spırttik ishimdik satýǵa tyıym salynǵan. Aıta ketetin bolsaq, jyl basynan oblys ortalyǵynda osyndaı 23 fakti anyqtaldy. Sonymen qatar, alkogoldik ishimdikterdi saǵat 21:00-den keıin satýǵa ruqsat etilmeıtinin eske salamyz. Alkogoldi asyra paıdalaný janjalǵa, buzaqylyqqa, dene jaraqattaryn keltirý men basqa da zań buzýshylyqqa ákeletinin esten shyǵarmaǵan jón. Qańtar aıynan bastap qalada tıisti lıtsenzııasyz spırttik ishimdik satqany úshin 55 adam jaýapqa tartyldy», - deıdi Rýstam Sadýlov.