Petropavldaǵy kórmede tabıǵatty tamashalaýǵa arnalǵan móldir qonaq úı tanystyryldy
PETROPAVL. QazAqparat - Petropavlda Qazaqstan men Reseıdiń aımaqaralyq yntymaqtastyq forýmy aıasynda týrıstik kórme jumys istep tur, dep habarlaıdy QazAqparat tilshisi.
Bul kórmede Reseıdiń Omby oblysy da óz áleýetin kórsetti. Shekaralas oblystan kelgen qonaqtar Soltústik Qazaqstan jurtyna bolashaqtyń qonaq úıin ala kelipti. Ol - móldir shar tárizdes eko-qonaq úı. Ombylyqtar mundaı ekotýrızmǵa suranys kóp bolatynyna senimdi.
Omby oblystyq týrıstik-aqparattyq ortalyǵy basshysynyń orynbasary Vasılıı Dedıýhınniń aıtýynsha, mundaı eko-qonaq úıler Frantsııada keń taralǵan. Al Reseıde kóp adam ony túsine bermeıdi.
«Mundaı qonaq úıdiń biregeı ereksheligi - tabıǵatpen ońasha qalýǵa múmkindik beretindiginde. Ol, ásirese, megapolıs turǵyndary úshin taptyrmas dúnıe. Qonaq úı tolyǵymen móp-móldir. Myna úlgide ishinde oryndyq bar, biraq onyń ornyna kereýet qoıýǵa da bolady. Bul qonaq úı eki adamǵa arnalǵan», - dep túsindirdi V.Dedıýhın.
Innovatsııalyq shatyrlar jylýdy saqtap turady. 15 gradýs aıazǵa deıin tótep beredi. Eko-qonaq úıdi Chelıabide nemese Frantsııadan tapsyrys berip, aldyrýǵa bolady. Degenmen, V.Dedıýhınniń sózinshe, quny úsh ese qymbatqa túsetinin eskerý kerek. Shamamen 500 myń Reseı rýblin jumsaýǵa týra keledi.
«Omby oblysy ekotýrızmge basa nazar aýdaryp otyr. Keleshekte osyndaı qonaq úılerden turatyn keshen ashqymyz keledi. Ázirge bıznes-jospar jasalǵan joq. Múmkin, kórmeden keıin bul másele kóbirek aıtylyp, ózektiligi arta túsetin shyǵar. Búginniń ózinde kóp adam qyzyǵýshylyq tanytyp, ishine kirip kórip jatyr. Munyń ózi - jetistik», - deıdi V.Dedıýhın.
Kórmege 40-tan astam eksponat qoıylǵan. Árqaısysynń tańǵaldyrarlyq ereksheligi bar.
