Petropavldaǵy kópqabatty úıdiń turǵyndaryna ótemaqy tólenedi
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov Petropavldaǵy problemaly turǵyn úı ǵımaratyn óz baqylaýyna aldy, dep habarlaıdy QazAqparat tilshisi.
«Nurly jer» memlekettik baǵdarlamasy boıynsha salynǵan kópqabatty úıdegi páter ıeleri jeltoqsan aıynan beri óz baspanasyna qonystana almaı keledi. Munyń sebebi - áli kúnge deıin ınjenerlik kommýnıkatsııalar joq. Turǵyndardyń aıtýynsha, olar osy ýaqytqa deıin satyp alǵan páterlerine ıpotekalyq nesıe tólep kelgen. Olardyń kópshiligi búginde úı jaldap turady, sondyqtan shyǵyndary eki ese artqan.
Oblys basshysynyń baspasóz qyzmeti habarlaǵandaı, úı turǵyndary jergilikti bılik tarapynan ótemaqy alatyn boldy.
«Petropavlda «Nurly jer» memlekettik baǵdarlamasy boıynsha salynǵan jańa ǵımarattyń máselesi meniń jeke baqylaýymda. Men qalalyq ákimdikke bul máseleni sheshýdi tapsyrdym. Osyndaı bosbelbeý áreketke jol bergen adamdar jazalanady. Árıne, biz óz azamattarymyzdy - turǵyndardy osyndaı máselemen betpe-bet qaldyrmaımyz. Olardyń naqty shyǵyndaryn óteý týraly másele sheshiledi. Úıdiń jumystary 20 mamyrǵa deıin aıaqtalady», - dedi Qumar Aqsaqalov.
Avtor: Olesıa Jýkoven
