Petropavldaǵy kópqabatty úıdegi jarylys: Páterler ákimdik esebinen jóndeledi
PETROPAVL. QazAqparat - Petropavldaǵy 5 qabatty úıde bolǵan jarylystan zaqymdalǵan 4 páter qalalyq ákimdik esebinen jóndeledi, dep habarlaıdy QazAqparat tilshisi.
Oqıǵa ornyna qalalyq ákimdiktiń mamandary kelip, 6 jáne 7 podezd turǵyndaryn páterlerinen ýaqytsha kóshirdi. Al, jarylys shyqqan eki bólmeli páterdi Reseıde turatyn ıesi jalǵa berip kelipti. Zardap shekken 4 otbasynyń ekeýi óz suraýlary boıynsha ýaqytsha turǵyn úılermen qamtamasyz etildi. Úshinshisi týystarynda turyp jatyr.
Búgin Petropavl qalalyq ákimdiginde osy máselege qatysty brıfıng bolyp, qala ákiminiń orynbasary Evgenıı Glotov túsinikteme berdi.
«Qala ákiminiń sheshimimen jarylys kezinde páterleri qıraǵan 4 otbasyǵa jóndeý jumystarymen biz kómektesemiz. Jóndeý jumystary aqpannyń toǵyzynan bastap júrip jatyr. Lıtsenzııasy bar qurylys kompanııasy jabyndardy bekitti jáne plastıkalyq terezeler men kire beris esikti aýystyrdy»,- deıdi Evgenıı Glotov.
Sondaı-aq, qala ákimi orynbasarynyń aıtýynsha, qatty zardap shekken úsh páter ıelerine 100 AEK kóleminde áleýmettik kómek kórsetildi. Al, 6 jáne 7 podezdiń qalǵan turǵyndaryna eshqandaı qáýip tónip turmaǵandyqtan úılerine qaıta kóshirildi.
Eske sala ketsek, 8 aqpanda Petropavldaǵy turǵyn úılerdiń birinde keshki saǵat 6-lar shamasynda jarylys bolǵanyn habarlaǵan bolatynbyz.
