Petropavldaǵy kóp qabatty úılerdiń birinde gaz qondyrǵysy jaryldy
PETROPAVL. QazAqparat - Petropavldaǵy «Internatsıonal, 4» mekenjaıyndaǵy 5 qabatty úıdiń besinshi qabatynda gaz jaryldy, dep habarlaıdy QazAqparat tilshisi.
Órt sóndirý qyzmetine jarylys týraly aqpar keshki altydan segiz mınýt ketkende túsken. Qutqarýshylar oqıǵa ornyna jetip 42 adamdy, sonyń ishinde 6 balany qaýipsiz jerge shyǵardy.
"Qaza tapqandar jáne jaraqat alǵandar joq. Biraq, jarylys kezinde úıde qart adam men onyń kishkentaı nemeresi bolǵan. Olardyń densaýlyǵyna zııan kelgen joq. Biraq páter aıtarlyqtaı zardap shekti, bólmelerdiń qabyrǵalary qulady", - deıdi SQO Tótenshe jaǵdaılar departamentiniń memlekettik til jáne aqparat tobynyń bas mamany Evgenıı Jýravlev.
Qazir oqıǵa ornynda Órt sóndirý qyzmetiniń mamandary jumys istep jatyr. Turǵyn úı tolyqtaı elektr qýatynan ajyratylǵan.
