Petropavldaǵy qoqys polıgonynda ekologııalyq zańnama saqtalmaǵan
PETROPAVL. QazAqparat – Petropavldaǵy turmystyq qatty qaldyqtar polıgony talapqa saı jumys istemeıdi, dep habarlaıdy QazAqparat tilshisi.
Soltústikqazaqstandyq ekologtar qoǵam ókilderinen quralǵan monıtorıngtik toppen birge Petropavldaǵy turmystyq qatty qaldyqtar polıgonynda bolyp, jaǵdaıdy kózben kórdi. Óıtkeni qoqys alańy jıi órtenip, jaǵymsyz ıis aýaǵa taralýynan turǵyndar tarapynan túsetin shaǵym kóp.
«Petropavldaǵy bul polıgon 1996 jyldan beri paıdalanyp keledi. 20 gektar aýmaqty alyp jatyr. Qazirgi ýaqytta ol 70% tolǵan. Qatty qaldyqtardy talaptardy saqtaı otyra durys ornalastyrylmaǵandyqtan munda jıi órt shyǵady. Kásiporynnyń málimetinshe, qazirgi tańda olardyń ınertti materıal alýǵa bolatyn kareri bar. Alaıda kásiporyn qarjy tapshylyǵynan jáne arnaıy tehnıkanyń joqtyǵynan ony paıdalana almaı otyr», - deıdi SQO Ekologııa departamenti basshysynyń orynbasary Azamat Bektasov.
Budan basqa byltyr jańa Ekologııalyq Kodeks kúshine endi. Ol boıynsha qoqys polıgonyna plastık, polıetılen, makýlatýra jáne áınekti qabyldaýǵa tyıym salynǵan. Bul talap ta munda oryndalyp jatqan joq.
Mamandardyń aıtýynsha, Petropavldaǵy turmystyq qatty qaldyqtar polıgonyna kúndelikti 130 tonna qoqys ákelinedi. Byltyr kásiporyn 5 mln teńgege qaldyqtardy irikteıtin jelini satyp aldy. Bul jylyna 20 myń tonna qoqysty irikteýge múmkindik bermek. Jańa jeli tek bıyl maýsym-shilde aılarynda ǵana qosylmaq.
Azamat Bektasovtyń aıtýynsha, «Ǵarysh sapary» ulttyq kompanııasymen jasalǵan kelisim bar. Olar oblys ortalyǵynan 50 shaqyrym radıýstaǵy aýmaqty qamtyp, ǵaryshtan túsirilgen keskinderdi beredi. Nátıjesinde byltyr ruqsatsyz ashylǵan 886 qoqys alańy anyqtaldy. Qala, aýdandyq ákimdiktermen belsendi jumys isteýdiń barysynda olardyń sanyn 25 % azaıtý múmkin boldy. Ekologııa zııan keltirýge jol bergeni úshin 8 aýyldyq okrýgtiń ákimi ákimshilik jazaǵa tartyldy.
Jalpy, qazir óńirde 400-den astam qoqys polıgony bolsa, sonyń tek 17-siniń ǵana ruqsat qujaty bar.
