Petropavldaǵy kóktaıǵaq: Bir táýlikte 80-nen astam adam jaraqattandy
PETROPAVL. QazAqparat - Ótken táýlikte 3-shi qalalyq aýrýhananyń travmatologııalyq pýnktine kelgender sany 84 adamǵa deıin artqan, dep habarlaıdy «QazAqparat» HAA tilshisi.
Travmpýnkt meńgerýshisi Valerıı Grıbashovtyń aqparaty boıynsha, kelýshilerdiń 66-sy kóshede jaraqat alsa, 11 adam aýrýhanaǵa jatqyzylǵan, olardyń keıbiri shuǵyl em alýy kerek.
«Jeti adamnyń tobyǵy, bir adamnyń omyrtqasy, úsh adamnyń jilinshigi, jeti adamnyń ıyǵy, 16 adamnyń bilegi jáne 3 adamnyń qabyrǵasy synǵan. Bes adam jol-kólik oqıǵasy saldarynan jaraqat alǵan. Kómek kórsetilgennen keıin barlyǵy úılerine qaıtaryldy», - dedi Valerıı Grıbashov.
Kóktaıǵaq saldarynan soltústikqazaqstandyq balalar da jaraqat alǵan. Oblystyq balalar aýrýhanasynyń bas dárigeri Oleg Zavıalovtyń aqparaty boıynsha, olarǵa bir táýliktiń ishinde bes adam kelgen. Eki bala aýrýhanaǵa jatqyzylǵan. Bir balanyń bilegi synsa, taǵy bir balanyń mıy shaıqalǵan.
Eske salaıyq, keshe Petropavlda aýa temperatýrasynyń tómendep, jańbyr jaýýy saldarynan qala muz aıdynyna aınaldy. Bir táýliktiń ishinde oblysta 20 jol-kólik oqıǵasy tirkelse, sonyń basym bóligi qalada bolǵan.
Foto: primorye24.ru
