Petropavldaǵy iri saýda ortalyǵynda órt shyqty

PETROPAVL. QazAqparat – Petropavlda iri saýda ortalyǵy órtendi, zardap shekkender joq, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, búgin saǵat 20.00 shamasynda «101» pýltine Petropavldaǵy Muqanov kóshesi, 53 mekenjaıyndaǵy «Semeınyı» gıpermarketinde órt shyqqandyǵy jóninde habarlama túsken.

Oqıǵa ornyna órt sóndirýshiler shuǵyl jetip, birden iske kiristi. Órt «Semeınyı» gıpermarketine japsarlas salynǵan ydys- qoraptar saqtaıtyn bir qabatty úı-jaıdan shyqqan.

Órtti sóndirýge jeke quramnan 35 adam, 10 tehnıka jumyldyryldy. Oqıǵa ornynda bes órt sóndirý bólimshesi jumys istedi.

Qutqarýshylar 200 adamdy, sonyń ishinde saýda ortalyǵynyń 50 qyzmetkerin jáne 150 kelýshini evakýatsııalady. Órt sóndirýshiler jalyn negizgi ǵımaratqa taralmaýy úshin qoldan kelgenshe shara qoldandy. Nátıjesinde órt shamamen bir saǵattan keıin tolyq sóndirildi. Jalyn 45 sharshy metr aýmaqty sharpydy.

Zardap shekkender men qaza tapqandar joq. Órttiń shyǵý sebebi men kelgen shyǵyn kólemin anyqtaý jumystary júrip jatyr.