Petropavldaǵy ınfektsııalyq aýrýhana qazan aıynda paıdalanýǵa berilmek
PETROPAVL. QazAqparat – Petropavlda qurylysy bastalǵan ınfektsııalyq modýldi aýrýhananyń irgetasy quıylyp bitýge jaqyn. Mamandardyń jospary boıynsha ǵımarat 1 qazan paıdalanýǵa berilse, tehnologııalyq qondyrǵylary 19 qazanǵa deıin ornatylmaq, dep habarlaıdy QazAqparat tilshisi.
SQO boıynsha qurylys, sáýlet jáne qala qurylysy basqarmasynyń málimetinshe, tez turǵyzylatyn modýldi aýrýhana 200 orynǵa shaqtalǵan. Onyń 180-i statsıonarlarda, qalǵany qarqyndy terapııa palatalarynda bolady. Ǵımaratta ákimshilik, medıtsınalyq blok, qabyldaý-dıagnostıka bólimshesi, ota jasaý blogy bar jansaqtaý bólimshesi jáne bir-birimen baılanysqan 5 palatalyq bólimshe ornalaspaq. Bólmeler úsh, eki jáne bir oryndyq bolmaq.
Nysannyń jalpy aýmaǵy – 6800 sharshy metr. Qurylysty «KAZPACO» JShS-i júrgizip jatyr. Astanalyq kompanııa buǵan deıin dál osyndaı ǵımarattardy Nur-Sultan, Almaty, Shymkent qalalarynda turǵyzǵan eken.
«Qurylys tamyz aıynda bastaldy. Jospar boıynsha 1 qazan ǵımarat salynyp bitedi. 19 qazanǵa deıin qajetti tehnologııalyq qondyrǵylar ornatylady. Ǵımaratty salýda arnaıy bloktar paıdalanylady. Ol materıal Nur-Sultan qalasyndaǵy Modex ınnovatsııalyq zaýytynda ázirlenedi. Qurylys alańyna daıyn kúıinde jetkiziledi», - deıdi SQO boıynsha qurylys, sáýlet jáne qala qurylysy basqarmasy basshysynyń orynbasary Qaırat Mustafın.
Búginge deıin ǵımarat irgetasynyń 90% quıylyp, 56 bloktyń 20 ornatylǵan. Іshki jáne syrtqa jeliler tartylyp jatyr. Qazir qurylysqa 200-ge jýyq adam tartylǵan.
