Petropavldaǵy Gýmanıtarlyq-tehnıkalyq ýnıversıtettiń jabylýyna baılanysty stýdentter «dalada qalmaıdy» - Bilim vıtse-mınıstri
ASTANA. Qańtardyń 28-i. QazAqparat /Gúlmıra Álıakparova/ - Petropavl qalasyndaǵy Gýmanıtarlyq-tehnıkalyq ýnıversıtettiń stýdentteri joǵary oqý ornynyń jabylýyna baılanysty «dalada qalmaıdy». Bul týraly búgin QR Bilim jáne ǵylym mınıstrliginde ótken QR Úkimetiniń janyndaǵy jastar isi jónindegi keńestiń otyrysynan keıin jýrnalısterdiń suraqtaryna jaýap bergen atalmysh vedomstvonyń vıtse-mınıstri Mahmetǵalı Sarybekov aıtty,
dep habarlaıdy QazAqparat.
M.Sarybekovtyń sózine qaraǵanda, Soltústik Qazaqstan oblysyndaǵy Gýmanıtarlyq-tehnıkalyq ýnıversıtet eki jyl boıy lıtsenzııasyz jumys istep kelgen. «JOO-ǵa kezinde lıtsenzııa berildi. Biraq ol mamandyqtardyń burynǵy jiktelimi boıynsha berildi, al jańa mamandyqtar ashylǵannan keıin olar lıtsenzııany jańartýy tıis bolatyn. Ýnıversıtet bolsa eski lıtsenzııamen jumysyn jalǵastyra bergen. Solaı, bilim týraly zańnamalardy óreskel buzyp keldi», - dep atap ótti ol.
Vıtse-mınıstrdiń aıtýynsha, QR BǴM-nyń Bilim jáne ǵylym salasyndaǵy baqylaý komıteti atalmysh JOO-ny sotqa berip, sot úderisin jeńip shyqqan. «Sot sheshimi boıynsha atalmysh JOO resmı túrde jabyldy. Biraq birde-bir stýdent «dalada qalmaıdy». Stýdentterdi olarǵa áleýmettik jaǵynan shyǵyn keltirmeıtindeı etip basqa JOO-larǵa aýystyrý máselesi ońynan sheshilýde», - dep qadap aıtty mınıstrlik ókili.
Aıta keteıik, Petropavl qalasyndaǵy Gýmanıtarlyq-tehnıkalyq ýnıversıteti jalǵan lıtsenzııamen jumysyn jalǵastyryp qana qoımaı, jyl saıyn syrttaı oqý bólimine stýdentterdi qabyldap kelgen. Qazirgi ýaqytta oqý ornynyń kúndizgi bóliminde oqyǵan 120 jáne syrttaı bólimniń birneshe júz stýdenti Bilim mınıstrligi tarapynan kómek kútýde.
