Petropavldaǵy eń bıik - 18 qabatty eki turǵyn úı taıaýda paıdalanýǵa beriledi
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov Petropavldaǵy qurylys alańdarynda bolyp, jumys barysymen tanysty, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, óńir basshysy Qumar Aqsaqalov barǵan alǵashqy nysan - «Jas Órken» aýdanynda salynyp jatqan elektr stansasynyń qurylys alańy. Bul qaladaǵy alǵashqy jabyq stansa bolmaq. Ol - jańa aýdandy elektr jaryǵymen tolyq qamtamasyz etetin bolady.
J.Jabaev kóshesinde ornalasqan «Jas órken» yqsham aýdanynda qurylys qarqyn alǵan. Qazir bul jerde Petropavldaǵy eń bıik - 18 qabatty eki turǵyn úı salynyp jatyr. Qumar Aqsaqalovtyń aıtýynsha, qalaǵa kire beriste ornalasqan 108 páterli bul ǵımarattar qala kórkin ashpaq. Kóp qabatty úıdiń bireýi bıyl jeltoqsan aıynda paıdalanýǵa berilmekshi.
Jalpy bıyl 2 240 páterdi tapsyrý josparlanǵan. Qurylysshylarmen áńgime barysynda óńir basshysy oblysta óz ónimin shyǵaratyn qurylys ındýstrııasyn qurý qajettigin aıtty.
«Bereke» yqsham aýdanynda Qumar Aqsaqalov kóshelerdiń keńeıtilýimen tanysty. Oblys ákimi jańa arnaıy ekonomıkalyq aımaqqa da bardy. Bul jerde burynǵy ǵımarattar qalpyna keltirilmek. Betonnan salynǵan ǵımarat 20 jyl bos turǵan. Sapaly salynǵan nysandy qoldanýǵa bolady. Osy aptada oǵan elektr jelisi tartylyp, jóndeý jumystary bastalmaq.
«Kelesi jyly temir jol jelisin tartamyz. Aımaqtyń ónimi eksportqa jóneltilmek, sol sebepti logıstıkany oılastyrý kerek. Investorlardy tartý qajet. Reseıde ótetin forým aıasynda bıznesmendermen kezdesip, olardyń araıy ekonomıkalyq aımaqpen tanystyrý qajet. Olar aımaqta jumys isteýge qulshynys tanytady dep oılaımyn», - dedi Qumar Aqsaqalov.
